Latur News : पीक कर्जावरील व्याजाचा परतावा मिळावा, पीक कर्ज वसुलीच्या नावाखाली शेतकऱ्यांची खाती होल्ड करणाऱ्या बँक अधिकाऱ्यांची चौकशी करावी, यासह विविध मागण्यांसाठी बुधवारी (ता. १९) देवणी येथे निलंगा-उदगीर रस्त्यावर रास्ता रोको आंदोलन करण्यात आले.

या आंदोलनामुळे रस्त्याच्या दोन्ही बाजूने वाहनांच्या लांबच लांब रांगा लागून चक्काजाम झाला होता. शेतकरी संघटनेचे मराठवाडा अध्यक्ष आनंद जिवणे यांनी या आंदोलनाचे नेतृत्व केले.

आंदोलनानंतर मागण्यांचे निवेदन अधिकाऱ्यांना देऊन मागण्या मान्य न झाल्यास तीव्र आंदोलनाचा इशारा श्री. जिवणे यांनी दिला. या आंदोलनाला सर्व पक्षांनी पाठिंबा देत सहभाग घेतला होता.

मुदत परतफेड केलेल्या पीक कर्जाचा व्याज परतावा मिळावा, पीकविमा व अनुदान शेतकऱ्यांच्या खात्यावर जमा करण्यात यावे, दिवसा आठ तास वीजपुरवठा करावा, पीककर्ज वसुलीच्या नावाखाली शेतकऱ्यांची बचत खाती होल्ड करून त्यांची अडवणूक करण्यात येत असून त्याची चौकशी करून संबंधित बँक अधिकाऱ्यावर कारवाई करावी, या मागण्यांसाठी हे आंदोलन करण्यात आले.

आंदोलनात सुरेंद्र आंबुलगे, मिथुन दिवे, गजानन उजळंबे, विकास नमनगे, मेळकुंदे, दत्ता अर्जुने, डॉ. अरविंद भांताब्रे, अमर मुर्के, देवणी तालुका काँग्रेस कमीटीचे अध्यक्ष अजित बेळकोणे, सोमनाथ लुल्ले, देवीदास पंतगे, शरण लुल्ले, अरुण पाटील, औदुंबर पांचाळ, माधवराव बिरादार यांच्यासह तालुक्यातील शेतकरी सहभागी झाले होते.