Kolhapur News : कोल्हापूर व हातकणंगले लोकसभा मतदार संघांसाठी चुरशीने मतदान झाले. कोल्हापूर लोकसभेसाठी सायंकाळी पाचपर्यंत ६३.७१ टक्के तर हातकणंगलेसाठी ६२.१८ टक्के मतदान झाले. उन्हाच्या पार्श्‍वभूमीवर ग्रामीण भागामध्ये सकाळी सातपासूनच मतदारांच्या रांगा लागल्या. तुलनेने शहरी भागात मतदानाची गती संथ होती. अनेक ठिकाणी किरकोळ बाचाबाचीचे प्रकार घडले.

कोल्हापूर लोकसभा मतदार संघांमध्ये महायुतीचे विद्यमान खासदार संजय मंडलिक आणि महाविकास आघाडीचे उमेदवार शाहू छत्रपती यांच्यामध्ये प्रमुख लढत आहे. तर हातकणंगले लोकसभा मतदार संघात महायुतीचे उमेदवार धैर्यशील माने, शिवसेना उद्धव ठाकरे गटाचे उमेदवार सत्यजित पाटील व स्वाभिमानी पक्षाचे उमेदवार राजू शेट्टी यांच्यामध्ये जोरदार सामना रंगला आहे.

महायुती आणि महाविकास आघाडी या दोघांनीही ही निवडणूक प्रतिष्ठेची केली आहे. सर्वच भागामध्ये प्रत्येक उमेदवाराची कमीअधिक ताकद असल्याने विजयाचा अंदाज बांधणे कठीण होत आहे.

सकाळी सात वाजता मतदानास प्रारंभ झाला. प्रशासनाने अनेक गावांमध्ये वैशिष्ट्यपूर्ण मतदार केंद्राची रचना केली होती. यामध्ये त्या-त्या गावच्या वैशिष्ट्यांची मांडणी केली होती. दुपारी एक ते चारपर्यंत मतदानाची गती उन्हामुळे मंदावली होती. सकाळी ११ पर्यंत सरासरी २० टक्के मतदान दोन्ही लोकसभा मतदार संघात झाले होते. सायंकाळी चारनंतर सहापर्यंत पुन्हा एकदा मतदानास वेग आला. चारनंतर पुन्हा रांगा लागल्या.