Pune News: ‘जलसाक्षरता केवळ एका चळवळीपुरती मर्यादित राहता कामा नये. त्यासाठी पाण्याचे प्रदूषण रोखावे. पाण्याचा योग्य सन्मान करावा. अशा विचारमंथनासह ‘पाणी आहे, तर भविष्य आहे’ असे सूत्र साधत पुणेकरांनी जलसाक्षरतेची शपथ घेतली.

‘दिशा २०२५’ आणि ‘अंतर्नाद कला साधना’ यांच्या संयुक्त विद्यमाने आयोजित ‘पाण्यासाठी एक साद’ या गीतमैफिलीतून पाणी वाचविण्याचा महत्त्वपूर्ण संदेश देण्यात आला. या उपक्रमाच्या अंतर्गत पाणी वाचविण्याचा संदेश देण्यासाठी अंतर्नाद कला साधना संस्थेच्या सहकार्याने संगीताचा प्रभावी वापर करण्यात आला.

या गीतमैफिलीत डॉ. गौरी बापट, अनुजा गाडे, प्रिया अय्यर आणि अनघा पाठक यांनी ‘घन बरसून आला’, ‘रिमझिम गिरे सावन’, ‘मळ्याच्या मळ्यामंदी पाटाचं पाणी जातं’, ‘ओ सजना बरखा बहार आयी’ ‘जलाशयाच्या लक्ष दर्पणी, ‘पाण्यातले पाहता प्रतिबिंब हासणारे’, ‘तोहरे ताल मिले नदी के जलमे’, ‘नभ उतरू आलं’ यांसारखी पाणी आणि निसर्गावर आधारित गाणी सादर केली. त्यास रसिकांना उत्स्फूर्त दाद दिली.

या वेळी जलव्यवस्थापनतज्ज्ञ सतीश खाडे यांनी पाणीटंचाई, जलप्रदूषण आणि त्यावरील उपाय याविषयी मार्गदर्शन केले. ते म्हणाले, ‘‘मानवी आरोग्याच्या समस्या वाढविणाऱ्या आजारांपैकी ७० टक्के आजार असुरक्षित पाण्यामुळे होतात. पाणी मिळवण्यासाठी स्थलांतर करणाऱ्या लोकसंख्येमुळे शहरे फुगत आहेत. त्यामुळे गुन्हेगारी वाढत आहे.’’

नागरिकांनी पाण्याच्या सुयोग्य वापरासंबंधीची प्रतिज्ञा घेऊन या चळवळीत सहभागी व्हावे असे आवाहन याप्रसंगी करण्यात आले. नीता उपासनी यांनी सूत्रसंचालन केले.