Kolhapur : कोल्हापूर विभागातील कृषी सहायकांनी आंदोलन अधिक तीव्र करताना बुधवारी (ता. २१) विभागीय कृषी सहसंचालक कार्यालयासमोर ठिय्या मांडला. कोल्हापूर विभागाअंतर्गत येणाऱ्या कोल्हापूर, सांगली व सातारा जिल्ह्यांतील कृषी सहायकांनी दिवसभर धरणे आंदोलन केले.

ऐन खरिपाच्या काळात शेतकऱ्यांना गरज असतानाही हा संप शासन लवकर मिटवत नसल्याबद्दल पदाधिकाऱ्यांनी तीव्र नाराजी व्यक्त केली. आम्ही आमच्या हक्काच्या मागण्यांसाठी आंदोलन करत आहोत यातून शेतकऱ्याचे नुकसान होऊ नये, असा आमचाही प्रयत्न आहे.

शासनानेही याबाबत ठोस आश्वासन देऊन मागण्यांबाबत कार्यवाही करावी, अशी मागणी तिन्ही जिल्ह्यांतील कृषी सहायक संघटनांच्या वतीने करण्यात करण्यात आली. कोणत्याही परिस्थितीत मागण्या मान्य झाल्याशिवाय आंदोलन मागे घेण्यात येणार नसल्याचा निर्धार व्यक्त करण्यात आला.

कोल्हापूर जिल्हा अध्यक्ष प्रदीप गावडे, कार्याध्यक्ष अमोल टिपुगडे, कोषाध्यक्ष महादेव जाधव, जिल्हा सरचिटणीस अनिल कांबळे, सातारा जिल्हाध्यक्ष संजय जाधव, सांगली जिल्हाध्यक्ष उत्तम खरमाटे, विभागीय सचिव संदीप कांबळे, माजी राज्याध्यक्ष संदीप केवटे आदींसह तिन्ही जिल्ह्यांतील कृषी सहायकांनी या आंदोलनात सहभाग घेतला.