Ratnagiri News : कृषी महाविद्यालय आणि फणस संशोधन केंद्रांचे प्रस्ताव लवकरच शासनाकडून मान्यता देण्यात येईल, असे कृषी मंत्री धनंजय मुंडे यांनी सांगितले आहे. तसेच सिंधुरत्न योजनेमधून दोन कम्युनिटी रेडिओ केंद्रांसाठी डॉ. बाळासाहेब सावंत कोकण कृषी विद्यापीठाला १ कोटी दिले जातील, असे पालकमंत्री उदय सामंत यांनी सांगितले.

लांजा तालुक्यातील गवाणे येथे डॉ. बाळासाहेब सावंत कोकण कृषी विद्यापीठाच्या भारतीय कृषी अनुसंधान परिषद नवी दिल्ली पुरस्कृत कृषी विज्ञान केंद्राच्या प्रशासकीय इमारतीचे उद्घाटनप्रसंगी पालकमंत्री सामंत बोलत होते. या वेळी कुलगुरू डॉ. संजय भावे, संचालक डॉ. प्रमोद सावंत, डॉ. प्रशांत बोडके, डॉ. प्रकाश शिनगारे, नगराध्यक्ष मनोहर बाईत, सरपंच भीमराज कांबळे आदी उपस्थित होते.

पालकमंत्री सामंत म्हणाले, की कृषी विज्ञान केंद्राच्या जमिनीचा उपयोग शेतकऱ्यांसाठी झाला पाहिजे. रेशीम उद्योगाबाबत व्यापक बैठक आयोजित केले आहे. महिला, युवक यांना या उद्योगाच्या माध्यमातून स्वतःच्या पायावर उभे करण्यासाठी विद्यापीठाने प्रयत्न करावेत.

कृषी महाविद्यालय आणि फणस संशोधन केंद्रासाठी ५० एकर जागा देण्याची जबाबदारी माझी आहे. कोकण कृषी विद्यापीठाने नावाप्रमाणे चांगले काम करावे. संशोधनात्मक काम करुन शेतकऱ्यांपर्यंत त्याची माहिती पोहचवावी. त्यांच्या उत्पन्नात वाढ करुन त्यांना कर्जमुक्त बनवावे, असे मार्गदर्शन करावे.

कोकण कृषी विद्यापीठ हे शेतकऱ्यांची मातृसंस्था आहे. त्याच मायेने शेतकऱ्यांना लाभ मिळावेत. या प्रसंगी कुलगुरू डॉ. भावे म्हणाले, की बांबूवर काम होणे आवश्यक आहे. १० हेक्टर जागा बांबूसाठी वापरली तर, आयात करायची आवश्यकता भासणार नाही. प्रास्ताविकेत डॉ. सावंत यांनी कोकण कृषी विद्यापीठाचा इतिहास आणि सद्यःस्थिती सांगितली. या वेळी पालकमंत्र्यांच्या हस्ते विविध उत्पादक शेतकऱ्यांचा सन्मान करण्यात आला.