Kolhapur News : जिल्ह्यातील नागरिकांकडे मराठा-कुणबी, कुणबी-मराठा जातीबाबतचे उपलब्ध असलेले १९६७ पूर्वीचे पुरावे, वंशावळी, शैक्षणिक व महसुली पुरावे, संस्थानिकांनी दिलेल्या सनदा, राष्ट्रीय दस्तऐवज इत्यादी जुनी अभिलेखे स्वीकारण्यासाठी जिल्हाधिकारी कार्यालयातील शिवाजी सभागृहात विशेष कक्ष स्थापन करण्यात आला आहे.

या कक्षासाठी अधिकारी, कर्मचाऱ्यांची नियुक्ती करण्यात आली आहे. नागरिकांनी त्यांच्याकडे उपलब्ध असलेली कुणबी जातीच्या पुराव्याची १९६७ पूर्वीची कागदपत्रे या विशेष कक्षात शुक्रवारपर्यंत (ता. २४) सादर करावीत, असे आवाहन जिल्हाधिकारी राहुल रेखावार यांनी केले.

मराठा-कुणबी, कुणबी-मराठा जातीचे प्रमाणपत्र पात्र व्यक्तींना देण्याबाबतची कार्यपध्दती विहीत करण्यासाठी न्यायमूर्ती संदीप शिंदे (निवृत्त) अध्यक्षतेखाली समिती गठित करण्यात आली आहे. या समितीच्या कामकाजाच्या अनुषंगाने समितीचे अध्यक्ष व सदस्यांचा कोल्हापूर जिल्हा दौरा नियोजित असून त्यांची बैठक जिल्हाधिकारी कार्यालय, कोल्हापूर येथे मंगळवार २८ नोव्हेंबर रोजी सकाळी १०.३० वाजता होणार आहे.

या समितीच्या दौऱ्याच्या अनुषंगाने जिल्ह्यातील नागरिकांकडे उपलब्ध असलेले पुरावे, वंशावळी, शैक्षणिक व महसुली पुरावे, संस्थानिकांनी दिलेल्या सनदा, राष्ट्रीय दस्तऐवज इत्यादी जुनी अभिलेखे जिल्हाधिकारी कार्यालयातील विशेष कक्षात शुक्रवारपर्यंत (ता. २४) स्वीकारण्यात येणार आहेत.

नागरिकांकडून सादर होणारी कागदपत्रे, पुरावे, अभिलेखे प्राप्त करून घेण्यासाठी विशेष कक्षासाठी नायब तहसीलदार, अव्वल कारकुन, महसूल सहायक, अधीक्षक, लिपिक या दर्जाच्या अधिकारी-कर्मचाऱ्यांची नियुक्ती करण्यात आली आहे. नागरिकांनी त्यांच्याकडील मराठा-कुणबी, कुणबी-मराठा जातीबाबतचे उपलब्ध असलेले १९६७ पूर्वीचे पुरावे, वंशावळी, शैक्षणिक व महसुली पुरावे, संस्थानिकांनी दिलेल्या सनदा, राष्ट्रीय दस्तऐवज इत्यादी जुनी अभिलेखे कार्यालयीन वेळेत या विशेष कक्षात सादर करावीत, असे आवाहन निवासी उपजिल्हाधिकारी संजय तेली यांनी केले.