Jalana News : एकात्मिक कापूस लागवड तंत्रज्ञानातून कापूस उत्पादकता वाढवता येईल, असे प्रतिपादन कृषी विज्ञान केंद्राचे वरिष्ठ शास्त्रज्ञ व प्रमुख एस. व्ही. सोनुने यांनी केले.

विशेष कापूस प्रकल्पांतर्गत केंद्रीय कापूस संशोधन संस्था, नागपूर कृषी विज्ञान केंद्र, खरपुडी, जालना व प्रभात सीड्स, जालना यांच्या संयुक्त विद्यमाने मंठा तालुक्यातील मोसा येथील शेतकरी देविदास राठोड यांच्या शेतावर कापूस शेती दिन व पीकपाहणी कार्यक्रमात श्री. सोनुने बोलत होते.

कार्यक्रमास कृषी विज्ञान केंद्राचे कीटक शास्त्रज्ञ प्रा. अजय मिटकरी, मृद्‍शास्त्रज्ञ प्रा. राहुल चौधरी, प्रभात सीड्सचे जिल्हा व्यवस्थापक रवींद्र तायडे, मोसा येथील प्रगतशील शेतकरी भीमराव राठोड आदी उपस्थित होते.

श्री सोनुने म्हणाले, की कापूस पिकात एकरी झाडांची संख्या वाढविणे, योग्य प्रमाणात योग्य वेळी शिफारस खत मात्रा देणे, झाडांची वाढ मर्यादित ठेवणे व ९० दिवसांनंतर झाडाचा शेंडा खुडने अशा पद्धतीने कापूस लागवड तंत्रज्ञानाचा वापर करावा.