Yavatmal News : जिल्हा परिषद प्रशासनाने मॉन्सूनपूर्व पाणी नमुने तपासणीला सुरवात केली आहे. मोहीम ३० जूनपर्यंत राबविण्यात येणार आहे. यामध्ये दैनंदिन रासायनिक व जैविकचे प्रत्येकी २० पाणी नमुने घेण्यात येणार आहे. शासनाने कार्यान्वित केलेल्या पोर्टलवर नोंदी केल्यानंतरच नमुने तपासणीसाठी प्रयोगशाळेत पाठविले जाणार आहे.

जिल्ह्यातील बाराशेहून अधिक ग्रामपंचायत क्षेत्रामधील जलस्रोतांची पाणीपुरवठा व स्वच्छता विभागाच्या वतीने मॉन्सूनपूर्व तसेच मॉन्सूननंतर तपासणी केली जाते. ग्रामस्तरावरील पिण्याच्या पाण्यामध्ये रासायनिक (नायट्रेट, फ्लोराईड) घटकाचे प्रमाण वाढत आहे. अशाप्रकारचे रासायनिक घटक वाढल्याने मानवी शरीरावर विपरीत परिणाम होतो.

बऱ्याचवेळा कायमचे अपंगत्व येण्याची शक्यता राहते. तसेच जैविकदृष्ट्या पाणी स्रोतांचे नियमित निर्जंतुकीकरण न केल्याने साथीच्या रोगांचा प्रादुर्भाव होण्याची शक्यता असते. त्यामुळे पाणी गुणवत्ता संनियंत्रण व सर्वेक्षण कार्यक्रमांतर्गत मॉन्सूनपूर्व सार्वजनिक पिण्याच्या पाण्याच्या स्रोतांची रासायनिक व जैविक तपासणी करण्याला सुरवात झालेली आहे.

पाणी गुणवत्ता तपासणी अभियान १ मे ते ३० जून दरम्यान राबविण्यात येत आहे. प्रत्येक तालुक्यातून दैनंदिन रासायनिक व जैविक, असे मिळून प्रत्येकी २० पाणी नमुने घेण्यात येत आहेत. हे नमुने केंद्र शासनाच्या पोर्टलवर नोंदी करणे बंधनकारक असून ही नोंद केल्याशिवाय पाणी नमुने तपासणीसाठी प्रयोगशाळेत पाठविण्यात येणार नाही.