Vasai News : वसई-विरार महापालिका शहराच्या सौंदर्यीकरणासाठी कोट्यवधी रुपये खर्च करत आहे. मात्र शहराला अनेक समस्यांनी विळखा घातल्याचे दिसून येत आहे. पावसाळा जरी लांबणीवर गेला, तरी पावसाळी कामे अपूर्णच आहेत. शहरात ठिकठिकाणी कचऱ्याचे साम्राज्य पाहावयास मिळत आहे. त्यामुळे नागरिकांच्या आरोग्यासह प्रदूषणाचा प्रश्न ऐरणीवर आला.

वसई-विरार शहरात नालेसफाई, गटार सफाई, जुन्या गटारांची दुरुस्ती, रस्ता डांबरीकरण आणि नवीन गटारांची उभारणी यासह अन्य कामे हाती घेतली आहेत; परंतु अनेक ठिकाणी गटारे उघडीच आहेत.

तसेच ज्या ठिकाणी काम सुरू आहे, तिथे लोखंडी सळ्या बाहेर आहेत. त्यामुळे लहान मुले, ज्येष्ठांसह सर्वसामान्य नागरिक यांचा तोल गेल्यास दुर्घटना होऊ शकते. याठिकाणी सुरक्षेची काळजी घेतली नसल्याचे दिसून येत आहे.

तसेच गटार, नालेसफाई करताना निघालेला गाळ, कचरा हा बाजूलाच टाकून दिला जात आहे. त्यामुळे नागरिकांना दुर्गंधी व घाणीचा सामना करावा लागत आहे. डासांची पैदास होऊन आजार उद्भवू शकतो, याकडे पालिकेने लक्ष देण्याची गरज आहे.

मूलभूत समस्या कायम

वसई-विरार शहरात नागरिकांना अनेक मूलभूत सुविधा मिळत नाहीत. पाणीपुरवठा वेळेत होत नाही. रस्त्यांचा अभाव, वाहतूक कोंडी आणि कचऱ्याची समस्या आहे. पावसाळ्यात पाण्याचा निचरा करण्यासाठी उभारण्यात येणाऱ्या गटारांचे काम अपूर्ण आहे.