Sangali News : सांगली ः अतिपावसामुळे वाळवा, मिरज, पलूस आणि शिराळा तालुक्यांतील पिकांचे नुकसान झाले आहे. वाळवा तालुक्यातील बाधित झालेल्या पिकांचे पंचनामे पूर्ण झाले आहेत. मात्र, मिरज, पलूस आणि शिराळा तालुक्यांतील बाधित पिकांचे अद्यापही पंचनामे सुरू झाले नाहीत. जिल्ह्यात जुलै, ऑगस्ट महिन्यांत अतिवृष्टी झाली.

यामुळे मिरज, पलूस, शिराळा आणि वाळवा या चार तालुक्यांतील पिकांना अतिवृष्टीचा फटका बसला. या चार तालुक्यांतील २१ हजार ३८९ शेतकऱ्यांचे २२ हजार ७५५ हेक्टरवरील पिके बाधित झाली आहेत. त्यामुळे शेतकऱ्यांचे १०३ कोटींचे नुकसान झाले असल्याचा प्राथमिक अंदाज कृषी विभागाने व्यक्त केला आहे. वाळवा तालुक्यातील पिकांचे पंचनामे गेल्या पंधरा दिवसांपूर्वी करण्यास सुरुवात केली.

गेल्या आठवड्यात वाळवा तालुक्यातील नुकसान झालेल्या पिकांचे पंचमाने पूर्ण करून त्याचा अहवाल जिल्हा कृषी कार्यालयात सादरही केला आहे. त्यामुळे पंचनामे पूर्ण करण्यात वाळवा तालुका आघाडीवर राहिला आहे. मिरज, पलूस आणि शिराळा तालुक्यांत अद्यापही कृषी विभागासह अन्य संबंधित विभागाने पंचनामे सुरू केले नसल्याचे चित्र आहे. या तीनही तालुक्यांतील पंचनामे करावेत अशी मागणी होत आहे. मात्र, याकडे कृषी विभागासह अन्य विभागाने दुर्लक्ष केले आहे.

दरम्यान, पलूस तालुक्यातील पिकांचे पंचनामे करण्याचे आदेश गेल्या दोन दिवसांपूर्वी दिले आहेत. त्यामुळे या तालुक्यातील पंचनामे दोन दिवसांत सुरू होतील अशी शक्यता आहे. मिरज आणि शिराळा या दोन तालुक्यांत पंचनामे करण्याचे आदेशच दिले नसल्याचे कृषी विभागातील एका अधिकाऱ्यांनी सांगितले. वास्तविक पाहता अतिवृष्टीमुळे बाधित झालेल्या पिकांचे पंचनामे सुरू करण्याचे आदेश एकाच वेळी दिले जातात. प्रत्येक तालुक्यात आदेश कसा दिला जात आहे, अशी चर्चा सुरू झाली आहे. पलूस तालुक्याला पंचनामे करण्याचे आदेश दिले असले तरी, पलूस, मिरज, शिराळात पंचनामे कधी होणार, असा सवाल शेतकरी करू लागला आहे.