Murud News : मुरुड तालुक्यातील भातकापणीची कामे पूर्ण झाली आहे. झोडणी, मळणीची कामेही संपत आली. आता थंडीला सुरुवात झाल्याने शेतकरी भातकापणीनंतर कडवे वाल, चवळी, मूग आदी कडधान्य पेरणीत व्यग्र झाले आहेत.

पूर्वी नातेवाईक तथा कुटुंबातील सदस्य कापणी, बांधणी व उडवे रचण्यासाठी परस्पर सहकार्य करायचे, त्याला ग्रामीण भाषेत ‘पटेल’ असे बोलतात. सद्यस्थितीत रोजगाराच्या शोधात ग्रामीण भागातील बहुतांश कुटुंबे मुंबईनगरीत स्थलांतरित झाल्याने मजुरांची आवश्‍यकता भासत आहे. मुरूड तालुक्यात भातलागवड योग्य क्षेत्र ३३०० हेक्टर आहे.

प्रत्यक्षात मात्र ३१०० हे. क्षेत्रावर लागवड झाली आहे. यंदा सरासरी २९०० मि.मी. पर्जन्य झाल्याने भातपिकाचे उत्पादन चांगले मिळणार आहे. गेल्या पंधरवड्यात उखारू जमिनीवरील हळव्या भाताची कापणी, झोडणीचे काम पूर्ण झाले आहे. तर खारपट्ट्यातील खोलगट भागातील गरवे भातकापणीला आठ दिवसांपूर्वीच सुरुवात झाली आहे. जवळजवळ भातकापणी पूर्ण झाली आहे.

न परवडणारी भातशेती

भातशेतीला लागवडपूर्व व नंतर मशागत, बियाणे, खते, मजुरी आदीचा विचार करता ती परवडत नसल्याची शेतकऱ्यांची खंत आहे. भातकापणीसाठी पुरुषाला ५०० ते ५५० मजुरी, तर महिलेला ३५० रुपये द्यावे लागतात. यापूर्वी भातविक्रीसाठी रोहा तालुक्यात जावे लागत होते; मात्र तीन वर्षांपासून मुरूड तालुक्यात पणन विभागातर्फे सरकार भातखरेदी करत आहे.

प्रतिक्विंटल भाताला २०४० रुपये इतका हमी भावही देण्यात येतो. मात्र, दोन वर्षांपासून सरकारतर्फे बोनस देय असूनही मिळत नसल्याची तक्रार आहे. सरकारने हमी भाव देऊ केला असला, तरीही भातलागवड क्षेत्र दिवसेंदिवस कमी होत आहे.