Sindhudurg News : जिल्ह्यातील ७५ टक्के भातपीक परिपक्व झाले असून शेतकऱ्यांनी कापणीला प्रारंभ केला आहे. सायकांळी पाऊस पडत असल्यामुळे सकाळच्या सत्रातच भातपीक कापणी केली जात आहे.

जिल्ह्यात यावर्षी ६२ हजार हेक्टरवर भातपीक लागवड करण्यात आले आहे. यामध्ये ५ टक्के हळव्या बियाण्यांच्या लागवडीचा समावेश आहे. ही पिके २० ते २५ दिवसांपूर्वीच परिपक्व झालेली आहेत. त्यानंतर दुसऱ्या टप्प्यात लागवड केलेली पिकेदेखील परिपक्व स्थितीत आहेत.

साधारणपणे ७५ टक्के भातपीक परिपक्व असून कापणीयोग्य आहे. सध्या जिल्ह्यात पावसाचे वातावरण आहे. तरीदेखील जिल्ह्यातील शेतकऱ्यांनी भातपीक कापणीला सुरुवात केली आहे. सकाळच्या सत्रात भातपीक कापणी करून दुपारपर्यंत कापणी केलेले पीक सुरक्षित ठिकाणी ठेवले जाते.

त्याच ठिकाणी त्या पिकांची झोडणी केली जात आहे. दुपारनंतर कोणत्याही क्षणी पाऊस कोसळत असल्यामुळे शेतकऱ्यांनी सध्या शक्य आहे. तेवढ्याच क्षेत्रावरील पिकांची कापणी सुरू ठेवली आहे. काही मोजक्याच शेतकऱ्यांनी कापणी सुरू केली आहे.

बहुतांश शेतकरी नवरात्रोत्सवानंतर कापणीला सुरुवात करण्याचा अंदाज आहे. दरम्यान पहिल्या टप्प्यातील भात कापणी अनिवार्य बनली आहे. पावसामुळे पीक नुकसानीची शक्यता असल्यामुळे पिकांची कापणी सुरू केली आहे.