Tala News : सध्या भातपिकासाठी पाऊस चांगला झाला होता. त्यामुळे भातपीक चांगले बहरले होते, मात्र आता भातकापणीच्या वेळेत पाऊस झाल्याने हाता-तोंडाशी आलेले पीक जमीनदोस्त होऊन मोठ्या प्रमाणात पिकांचे नुकसान झाले आहे.

या पिकांची पाहणी, पंचनामा होऊन शेतकरी बांधवांना नुकसानभरपाई मिळावी, अशी मागणी शेतकरी बांधवांच्या वतीने करण्यात येत आहे. या गेल्या पाच वर्षांत जंगलात माकडे, डुकरे यांचा उपद्रवसुद्धा मोठ्या प्रमाणात वाढला आहे.

त्यामुळे भातशेतीचे प्रचंड नुकसान झाले आहे. परिसरातील शेतकरी भातपीक २५ टक्के घेतात, मात्र त्यातही जंगली प्राण्यांचा मोठ्या प्रमाणात वावर असल्यामुळे शेतकरी मेटाकुटीला आला आहे.

दसरा, कोजागरी पौर्णिमा झाली, परंतु पाऊस काही पूर्ण गेला नसल्यामुळे आता शेतकरी बांधवांनी करायचे काय, असा सवाल येथील भात उत्पादक शेतकऱ्यांनी केला आहे.

पंचनामा करा

पीक विमा उतरवण्यात आला आहे. शेतकरी बांधवांना नुकसान झाल्यास विमा कंपनी प्रतिनिधीला ७२ तासांत कळविणे बंधनकारक आहे. त्यामुळे शेतीच्या नुकसानीचा फोटो काढून महसूल व कृषी यंत्रणांकडून पंचनामा केला जावा, अशी मागणी शेतकऱ्यांनी केली आहे.