Sindhudurg News : कोकणात गुरुवारी (ता. १४) व शुक्रवारी (ता. १५) विजांच्या कडकडाटासह पाऊस पडण्याचा अंदाज हवामान विभागाने दिला असून पावसाच्या शक्यतेने भात पीक, नाचणी उत्पादकांसह आंबा, काजू बागायतदार धास्तावले आहेत.

जिल्ह्यात ३ नोव्हेंबरला हलका पाऊस झाला होता. त्यानंतर पाऊस पूर्णपणे थांबला. त्यामुळे शेतकऱ्यांनी भात, नाचणी पीक काढणीवर लक्ष केंद्रीत केले. आतापर्यंत जिल्ह्यातील ९० टक्के भातपिकांची कापणी पूर्ण झाली आहे.

तर नाचणी पीक काढणीला नुकतीच सुरुवात झाली आहे. दरम्यान हवामान विभागाने अरबी समुद्रात कमी दाबाचे क्षेत्र निर्माण झाल्यामुळे सिंधुदुर्ग, रत्नागिरी आणि रायगड जिल्ह्यात त्याचा परिणाम जाणवणार असल्याचा अंदाज दिला असून कोकणात १४ व १५ रोजी विजांच्या कडकडाटासह पावसाचा इशारा हवामान विभागाने दिला आहे.