Mumbai News : विधानसभेच्या २८८ मतदार संघांसाठी निवडणुकीकरिता मंगळवारपर्यंत (ता. २९) म्हणजेच अर्ज दाखल करण्याच्या अखेरच्या दिवशीपर्यंत ७ हजार ९९५ उमेदवारांचे १० हजार ९०५ नामनिर्देशन पत्र दाखल झाले आहेत. या अर्जांची छाननी होऊन ४ नोव्हेंबरपर्यंत माघारीची अंतिम मुदत आहे. त्यानंतर विधानसभा निवडणुकीचे अंतिम लढतीचे चित्र स्पष्ट होणार आहे.

राज्यात महायुतीमधील भाजप, राष्ट्रवादी काँग्रेस अजित पवार गट आणि शिवसेनेचा शिंदे गट विरुद्ध महाविकास आघाडीतील काँग्रेस, शिवसेना उद्धव बाळासाहेब ठाकरे गट आणि राष्ट्रवादी काँग्रेसचा शरदचंद्र पवार गट अशी लढत होणार आहे.

या निवडणुकीत इच्छुक उमेदवारांना पक्षांचे अनेक पर्याय असल्यामुळे पक्षांतर मोठ्या प्रमाणात झाले तसेच सर्वच पक्षांमध्ये बंडखोरी ही वाढली आहे. त्यामुळे अर्ज माघारीसाठी आता सहाही पक्षांना इच्छुकांच्या नाकदुऱ्या काढाव्या लागणार आहेत. या निवडणुकीत वंचित बहुजन आघाडी तसेच आमदार बच्चू कडू, माजी खासदार संभाजी राजे आणि माजी खासदार राजू शेट्टी यांनीही तिसरा पर्याय दिला आहे.

विधानसभा सार्वत्रिक निवडणुकीची आचारसंहिता १५ ऑक्टोबरपासून लागू झाली असून २२ ऑक्टोबर रोजी निवडणूक अधिसूचना प्रसिद्ध करण्यात आली. मंगळवारी (ता. २९) नामनिर्देशन पत्र दाखल करण्याची शेवटची तारीख होती. शेवटच्या दिवशी दाखल करण्यात आलेल्या अर्जांची छाननी प्रक्रिया बुधवारी (ता. ३०) सुरू होती.

४ नोव्हेंबर रोजी अर्ज मागे घेता येतील. मतदान २० नोव्हेंबरला होत असून, २३ नोव्हेंबर रोजी मतमोजणी होणार आहे.