Mumbai News : नोव्हेंबर २०२३ ते जुलै २०२४ या कालावधीत राज्यात झालेल्या अवकाळी पावसामुळे पिकांच्या नुकसानीपोटी ३०७ कोटी २५ लाख २९ हजार रुपयांच्या निधी वितरणाचे आदेश राज्य सरकारने दिले आहेत. यामध्ये नागपूर, संभाजीनगर, अमरावती विभागांत सर्वाधिक नुकसानीची मदत मिळणार आहे.

राज्य सरकारने विभागीय आयुक्तांकडून आलेल्या प्रस्तावानुसार, १० जानेवारी व ३१ जानेवारी, रोजी अनुक्रमे १४४ कोटी १० लाख आणि २१०९ कोटी १२ लाख रुपये मदत वितरित करण्यास मान्यता दिली होती.

नोव्हेंबर आणि डिसेंबर २०२३ या कालावधीत झालेल्या नुकसानीपोटी तसेच जानेवारी ते मे २०२४ या कालावधीतील नुकसानीपोटी २९६ कोटी २१ लाख रुपये इतकी मदत वितरित करण्यास मान्यता दिली होती. तरीही नोव्हेंबर ते जुलै २०२४ या कालावधीतील काही प्रस्तावांची मदत वितरित करण्यात आली नव्हती.

ही मदत वितरित करण्यास राज्य सरकारने मान्यता दिली आहे. यामध्ये नाशिक विभागात ८९ लाख २७ हजार, पुणे विभागातील कोल्हापूर जिल्ह्यात ५ लाख ४८ हजार, अमरावती विभागात २ कोटी ७० लाख १४ हजार, संभाजीनगर विभागात ९२ कोटी ४८ लाख ७४ हजार, नागपूर विभागात २०३ कोटी ५३ लाख, ४२ लाख, कोकण विभागात ७ कोटी ५५ लाख ४ हजार अशी एकूण ३०७ कोटी २५ लाख २९ हजार रुपयांची मदत वाटप करण्यास मान्यता देण्यात आली आहे.