Pune News : विविध देशांनी विकसित केलेले शेतीविषयक तंत्रज्ञान व त्याद्वारे शेतकऱ्यांच्या उत्पन्नात झालेली वाढ याबाबत शेतकऱ्यांचे ज्ञान आणि क्षमता उंचावण्यासाठी कृषी विभागाने परदेशात अभ्यासदौरे करण्याची संधी उपलब्ध केली आहे. इच्छुकांनी बुधवारपर्यंत (ता. ३१) तालुका कृषी अधिकारी कार्यालयात अर्ज सादर करावेत, असे आवाहन जिल्हा अधीक्षक कृषी अधिकाऱ्यांनी केले.

शेतीशी निगडित घटकांबाबत जगात वेळोवेळी होत असलेले बदल, विकसित होत असलेले तंत्रज्ञान हे शेतकऱ्यांपर्यंत पोहोचविण्यासाठी कृषी विस्तार कार्यक्रमाद्वारे प्रयत्न करण्यात येत आहेत. त्याचाच एक भाग म्हणून २०२३-२४ मध्ये जिल्ह्यातील शेतकऱ्यांचे परदेशात अभ्यास दौऱ्याचे आयोजन करण्यात येत आहे.

योजने अंतर्गत जर्मनी, फ्रान्स, स्पेन, स्वित्झर्लंड, ऑस्ट्रिया, न्यूझीलंड, नेदरलँड, व्हिएतनाम, मलेशिया, थायलंड, पेरू, ब्राझील, चिली, ऑस्ट्रेलिया, सिंगापूर आदी संभाव्य देशांची निवड करण्यात आली आहे.

एक लाखांचे अनुदान

शासनाकडून अभ्यास दौऱ्यासाठी सर्व घटकातील शेतकऱ्यांना एकूण खर्चाच्या ५० टक्के रक्कम किंवा अधिकाधिक १ लाख रुपये प्रतिलाभार्थी यापैकी कमी असेल ती रक्कम अनुदान देण्यात येईल.

शेतकऱ्याचे त्याचे बँकेचे खाते आधार क्रमांकाशी जोडून घेणे आवश्यक आहे. निवड झाल्यानंतर दौऱ्याचा १०० टक्के खर्च प्रवासी कंपनीकडे आगावू स्वतः भरावा लागेल. दौऱ्यानंतर अनुदानाची रक्कम खात्यावर जमा करण्यात येईल.

दौऱ्यासाठीच्या अटी

- लाभार्थी हा स्वतः शेतकरी असावा

- सातबारा व आठ ‘अ’ उतारा असावा

- उत्पन्नाचे मुख्य साधन शेती असल्याचे स्वयंघोषणापत्र (प्रपत्र १) अर्जासोबत सादर करावे

- अर्जासोबत आधार पत्रिकेची प्रत द्यावी

- किमान बारावी उत्तीर्ण असावे

- वय २५ ते ६० वर्षे असावे

- शेतकरी वैध पारपत्रधारक असावा

- शेतकरी शासकीय, निमशासकीय, सहकारी, खासगी संस्थेत नोकरीत नसावा

- डॉक्टर, वकील, सीए, अभियंता, कंत्राटदार नसावा.

- शारीरिकदृष्ट्या तंदुरुस्त असल्याबाबतचे वैद्यकीय प्रमाणपत्र सादर करावे