Nashik News : यंदा खरीप लाल कांदा उत्पादक पट्ट्यात पावसामुळे हंगाम काहीसा अस्थिर झाला. अनेक भागांत सुरुवातीला पाऊस नव्हता. तर नंतर झालेल्या जोरदार पावसामुळे कांदा रोपांचे नुकसान झाले. तर काही भागांत अद्याप पाणीटंचाई आहे.

अशा परिस्थितीत कांदा लागवडीला गती आली आहे. कृषी विभागाच्या माहितीनुसार सोमवारअखेर (ता. २६) जिल्ह्यात १२ हजार हेक्टरवर कांदा लागवडी झाल्या आहेत. लागवडी सुरू असल्याने त्यात वाढ होणार आहे.

खरीप लाल कांदा उत्पादनात नाशिक जिल्ह्याची दरवर्षी आघाडी असते. सरासरी २० हजार हेक्टर क्षेत्रावर लागवड होते. मात्र सुरुवातीला काही ठिकाणी पावसाचे कमी प्रमाण तर काही ठिकाणी अतिवृष्टी यामुळे लागवडीचे नियोजन कोलमडले. मात्र अशाही परिस्थितीत शेतकऱ्यांनी कांदा रोपांचे नियोजन करून लागवडी केल्या आहेत.

जुलैअखेर नंतर टप्प्याटप्प्याने लागवडी सुरू झाल्या. सुरुवातीला मालेगाव तालुक्यात लागवडीचा टक्का वाढल्याचे दिसून आले. नंतर पाऊस होताच चांदवडमधील शेतकऱ्यांनी लागवडीत आघाडी घेतली.

जिल्ह्यातील कांदा लागवडीची ठळक स्थिती

सुरुवातीच्या टप्प्यात मालेगाव तालुक्यात लागवडीला सुरुवात

पाऊस झाल्यानंतर सिंचनाची सुविधा होताच चांदवड तालुक्यात सर्वाधिक लागवडी

येवला तालुक्यात रोपवाटिका सर्वाधिक; मात्र विहिरींमध्ये पाणी कमी असल्याने लागवडीचा टक्का कमी, मुगाची शेते खाली होताच लागवडींसाठी टक्का वाढता

सिन्नर, देवळा तालुक्यांत पुढील आठवड्यानंतर रोपे उपलब्ध होताच लागवडी वाढणार

नांदगाव तालुक्यात लागवडीचा टक्का कमी

तालुकानिहाय लागवड स्थिती (हेक्टरमध्ये) (ता. २६ ऑगस्टअखेर)

निफाड ४२

सिन्नर ३९३.७

येवला २,६१२

चांदवड ४,४६८

मालेगाव ४,११०

सटाणा १८०

नांदगाव ३५

देवळा ८०१

एकूण १२,६४२

(संदर्भ : कृषी विभाग-जिल्हा अधीक्षक कृषी कार्यालय)