Akshay Ttritiya : अक्षय तृतीयेच्या मुहूर्तावर कोल्हापूर जिल्ह्यात धूळवाफ भात पेरणीसाठी भात बियाणे खरेदी व बीज प्रक्रिया करण्यास सुरुवात झाली. पावसाळी खरीप हंगामात खताची टंचाई निर्माण होऊ नये, यासाठी शासन कृषी विभागाच्या वतीने युरिया आणि डीएपी खताचा २२१९ टन खतांचा बफर स्टॉक करण्यात आला आहे. जिल्हाधिकारी अमोल येडगे या कमिटीचे अध्यक्ष असून, खते व बियाणे यामध्ये बनावटगिरी होऊ नये, यासाठी १३ भरारी पथके तयार करण्यात आली आहेत.

कोल्हापूर जिल्ह्यात खरिपाचे उसाचे व भात व इतर पिकांचे धरून सुमारे तीन लाख ८२ हजार हेक्टर क्षेत्र आहे. पावसाच्या तोंडावर अक्षय तृतीयेच्या मुहूर्तावर पन्हाळा व करवीर तालुक्यात धूळवाफ भात पेरणीला आज सुरुवात झाली आहे. दुपारी काही ठिकाणी पावसाचा शिडकावा झाला, आज पावसाचे वातावरण निर्माण झाल्याने शेतकऱ्यांच्यात शेतीच्या कामाला उत्साह होता.

पावसाळी खरिपात खताची टंचाई टंचाई निर्माण होऊ नये यासाठी महाराष्ट्र शासन कृषी विभागाच्या वतीने, महाराष्ट्र कृषी उद्योग विकास महामंडळाकडे युरिया खताचे २०१९ टन व डीएपी खताचा २०० टन बफर स्टॉक करण्यात आला आहे. पावसाळ्यात शेतकऱ्यांकडून मागणी असल्यास १५ ऑगस्टनंतर हे खत वितरित केले जाणार आहे.

खरिपात यंदा उसाचे एक लाख ८६ हजार हेक्टर क्षेत्र असून भात भुईमूग व इतर पिकाखाली एक लाख १९ हजार १९६ हेक्टर क्षेत्र आहे. यामध्ये भारताचे ९५ हजार, भुईमुगाचे ३७ हजार, सोयाबीनचे बेचाळीस हजार व नाचणीचे १७ हजार हेक्टर क्षेत्र आहे.

भाताचे ४५८५ क्विंटल, तर सोयाबीनचे ६३० क्विंटल बियाणे उपलब्ध आहे. खतामध्ये युरिया ३२,८५९, डीएपी ४८७७, एमओपी ४९२५, सुपर फॉस्फेट ४२०२६, एस. एस. पी. ८७०२ टन खत उपलब्ध आहे.

यावेळी जिल्हा कृषी विकास अधिकारी अभयकुमार चव्हाण म्हणाले की, ‘खरीप हंगामासाठी खते व बियाणे पुरेशा प्रमाणात उपलब्ध आहेत. १३ भरारी पथके तैनात आहेत. युरिया डीएपीचा बफर स्टॉक करण्यात आला आहे. खतांची दरवाढ झालेली नाही.