Solapur News: सोलापूरच्या श्री सिद्धेश्‍वर बाजार समितीने बाजार समितीच्या कामकाजात सुलभता येण्यासाठी मोठा निर्णय घेतला असून, प्रशासन, विभागप्रमुख व सुरक्षा यंत्रणेच्या सदैव संपर्कात राहण्यासाठी वॉकी-टॉकी यंत्रणा कार्यान्वित केली आहे.

गेटवर होणारी वाहनाची गर्दी, अपघात, चोरीचे प्रकार टाळण्यासाठी ही यंत्रणा उपयुक्त ठरणार असल्याचे बाजार समितीचे सभापती दिलीपराव माने यांनी सांगितले.

श्री सिद्धेश्वर कृषी उत्पन्न बाजार समितीमध्ये सभापती माने यांनी पुन्हा एकदा पहाटे स्वतः जाऊन कामकाजाची पाहणी केली. याच वेळी प्रशासन, विभाग प्रमुख, सुरक्षा रक्षक व सुरक्षा यंत्रणेशी त्वरित संपर्कासाठी वॉकी-टॉकी यंत्रणा कार्यान्वित केली.

त्यामुळे बाजार समितीच्या कानाकोपऱ्यात यंत्रणेशी संवाद साधला जाणार असून, गेटवर ट्रॅफिक, मालाची चोरी, यावर नियंत्रण ठेवता येणार असून गर्दी, गडबड, गोंधळ टाळण्यास मदत होणार आहे.

बाजार समितीने प्रशासकीय कामकाजात केलेल्या आमुलाग्र बदलाचे शेतकरी, व्यापारी वर्गातून कौतुक होत आहे. या वेळी बाजार समितीचे माजी संचालक केदार उंबरजे, सचिव अतुल रजपूत, सर्व विभाग प्रमुख उपस्थित होते.