Kolhapur News : बदलत्या वातावरणाचा भाजीपाला रोपवाटिकांना चांगलाच फटका बसत आहे. सातत्याने पडणाऱ्या पावसामुळे शेतकऱ्यांना भाजीपाला लागवड करता येत नसल्याची स्थिती आहे. जोरदार पाऊस आणि कडक ऊन शेतकऱ्यांनी भाजीपाला रोपवाटिकांकडे पाठ फिरवली आहे. लाखो रुपयांची गुंतवणूक करून रोपवाटिका चालकांना शेतकऱ्यांची प्रतीक्षा करावी लागत आहे. सततच्या पावसामुळे अद्याप शेतामध्ये पाणी साचले आहे.

परिणामी आणखी काही दिवस शेतकऱ्यांना भाजीपाल्याची लागवड करण्यासाठी वाट पाहावी लागणार आहे. मॉन्सूनपूर्व पावसानंतर कडक ऊन आणि ढगाळ वातावरणामुळे भाजीपाल्यावर रोगराईची भीती आहे. सध्याच्या बदलत्या वातावरणामुळे शेतकरी भाजीपाला लागवडीकडे दुर्लक्ष करत आहे. वास्तविक मे महिन्याच्या अखेरपासून भाजीपाला रोपवाटिकांचा हंगाम सुरू होतो.

मात्र गेल्या अनेक वर्षात प्रथमच मान्सूनपूर्व पावसाने जोरदार हजेरी लावल्याने शेतामध्ये अद्याप पाणी आणि चिखलाचे साम्राज्य आहे. पुन्हा पावसाने हजेरी लावली नाही तर पंधरा दिवसांत शेतीत घात येणार आहे. यानंतर भाजीपाला लागवडीची शेतकऱ्यांची धांदल सुरू होण्याची आशा रोपवाटिका चालकांना आहे. गेल्या अनेक वर्षात प्रथमच मे महिन्यात मोठ्या प्रमाणावर मॉन्सूनपूर्व पावसाने हजेरी लावली याचा परिणाम शेती चक्रावर झाला आहे.

शेतामध्ये पाणी तुंबून राहिल्याने भाजपला लागवडीकडे शेतकऱ्यांचा म्हणावा तसा प्रतिसाद नाही. बदलत्या वातावरणात भाजीपाल्यावर रोगराईची भीती आहे. भाजीपाला रोपवाटिका चालकांनी वांगी, मिरची, कोबी, फ्लॉवर, टोमॅटो अशी रोपे तयार करून हंगामाची जोरदार तयारी केली आहे.

अनेक रोपवाटिका चालकांनी अगदी चार लाखांपासून आठ ते दहा लाखांपर्यंतची गुंतवणूक केली आहे. शिवाय पंधरा दिवसांपूर्वी झालेल्या मॉन्सूनपूर्व पावसाने काही रोपवाटिका चालकांचेही नुकसान झाले आहे. हंगामाच्या सुरुवातीलाच मॉन्सूनपूर्व पावसाने रोपवाटिका चालकांना फटका बसला आहे.