Nandurbar News : कोविड-१९ चे व्यवस्थापन करून कोरोनामुक्त गाव (Corona Free Village) स्पर्धेत ग्रामपंचायत नानगीपाडा (ता. नवापूर) यांनी नंदुरबार जिल्ह्यात प्रथम क्रमांक मिळवून त्यांची विभागस्तरावर निवड झाली.

राज्य शासनाने पुरस्कृत केलेल्या कोविड-१९ व्यवस्थापन केलेली कोरोनामुक्त गाव स्पर्धा झाली. स्पर्धेत प्रथम टप्प्यात ग्रामपंचायत स्तरावर प्रत्येक तालुक्यातून दहा पंचायतीचे प्रस्ताव मागविण्यात आले.

त्यातून जिल्हास्तरावर जिल्हा परिषदेकडून समितीचे अध्यक्ष मुख्य कार्यकारी अधिकारी रघुनाथ गावडे यांनी सर्वोच्च गुण प्राप्त असलेल्या नवापूर तालुक्यातील ग्रामपंचायत नानगीपाडा तालुक्यात प्रथम क्रमांक मिळवून जिल्ह्यातही प्रथम क्रमांक राखत स्थान निश्चित ठेवले.

दुसऱ्या क्रमांकावर शहादा तालुक्यातील प्रकाशा ग्रामपंचायत, तर तिसऱ्या क्रमांकावर तळोदा तालुक्यातील इच्छागव्हाण या पंचायतींची नावे जाहीर केली.

गावात संशयित रुग्ण आढळल्यास त्याला खासगी वाहनाची व्यवस्था करून खासगी किंवा सरकारी दवाखान्यात दाखल करण्याची सोय करण्यात आली. संशयित रुग्णाला व त्याच्या कुटुंबीयांना घरपोच किराणा भाजीपाला पुरविण्याची सोय करण्यात आली.

कोविड-१९ व्यवस्थापन करून गावाला कोरोनामुक्त जास्त कसे करता येईल याबाबत मुख्य कार्यकारी अधिकारी रघुनाथ गावडे यांनी मार्गदर्शन केले.