Akola News : जागतिक हवामान बदलासह खुल्या आंतरराष्ट्रीय बाजारपेठेच्या पार्श्‍वभूमीवर देशांतर्गत शेती शाश्वत होण्यासोबत गाव-खेडे आर्थिक व सामाजिक दृष्टिकोनातून स्वयंपूर्ण, आत्मनिर्भर होणे अत्यावश्यक आहे. डॉ. पंजाबराव देशमुख कृषी विद्यापीठाची मॉडेल व्हिलेज संकल्पना राज्यासाठी दिशादर्शक ठरेल, असा आत्मविश्‍वास कुलगुरू डॉ. शरद गडाख यांनी व्यक्त केला.

विद्यापीठाच्या शिक्षण विस्तार संचालनालयाद्वारे संचालित विदर्भस्तरीय मॉडेल व्हिलेज योजना, शेतकरी शास्त्रज्ञ मंच आणि कृषी निविष्ठा विक्री केंद्र यांची संयुक्त बैठक कृषी विद्यापीठात झाली. या वेळी बैठकीचे अध्यक्ष म्हणून ते बोलत होते. बैठकीला कृषी विज्ञान केंद्र, कृषी संशोधन केंद्र, कृषी महाविद्यालयांचे प्रमुख, शास्त्रज्ञ, विषयतज्ज्ञ, प्राध्यापक आदी उपस्थित होते.

या वेळी व्यासपीठावर विद्यापीठाचे संशोधन संचालक डॉ. विलास खर्चे, शिक्षण विस्तार संचालक डॉ. धनराज उंदीरवाडे, कृषी अभियांत्रिकी अधिष्ठाता डॉ. सुरेंद्र काळबांडे आदी उपस्थित होते. तर सहयोगी अधिष्ठाता डॉ. शैलेश हरणे, डॉ. राजेंद्र काटकर, नियंत्रक प्रमोद पाटील, विस्तार शिक्षण विभागाचे प्रमुख डॉ. नितीन कोष्टी यांच्यासह कृषी विज्ञान केंद्र, कृषी संशोधन केंद्र, कृषी महाविद्यालयाचे प्रमुख, शास्त्रज्ञ, विषयतज्ज्ञ, प्राध्यापक सर्व वरिष्ठ संशोधन शास्त्रज्ञ, विभाग प्रमुख, अधिकारी- कर्मचारी सभागृहात उपस्थित होते.

प्रास्ताविकात डॉ. उंदीरवाडे यांनी बैठकीचा उद्देश सांगितला. जिल्हास्तरावर निवडलेले प्रत्येक एक गाव ‘मॉडेल व्हिलेज’ लौकिकास पात्र ठरावे, जेणेकरून भविष्यात तालुका पातळीवर प्रत्येकी एक गांव व पर्यायाने संपूर्ण विदर्भ शेती समृद्ध व आत्मनिर्भर करता येईल, असे सांगितले.

डॉ. खर्चे यांनीही मार्गदर्शन केले. या प्रसंगी मॉडेल व्हिलेज चेलका (अकोला), शेलगाव घुगे (वाशीम), असोना (अमरावती), मुरादपूर (बुलडाणा), मोहम्मदपूर (यवतमाळ), दिघी बोपापूर (वर्धा), किनगीपार (गोंदिया), पापडा खुर्द (भंडारा), नाचन भट्टी (चंद्रपूर), शिरपूर (गडचिरोली), सालईमेंढाच्या (नागपूर) प्रभारी अधिकाऱ्यांनी सादरीकरण केले. मागील वर्षातील प्रगतीचा लेखाजोखा सभागृहाला सादर केला.

बैठकीसाठी डॉ. उंदीरवाडे यांच्या मार्गदर्शनात मुख्य शिक्षण विस्तार अधिकारी डॉ. उमेश चिंचमलातपुरे, मुख्य संपादक प्रा. संजीवकुमार सलामे, विस्तार प्रशिक्षण अधिकारी डॉ. सुहास मोरे, कृषी तंत्रज्ञान माहिती केंद्राचे प्रभारी अधिकारी डॉ. प्रकाश घाटोळ, विषय तज्ज्ञ कृतिका गांगडे आदींनी पुढाकार घेतला.

एकात्मिक प्रयत्नांची मोट बांधणे गरजेचे : डॉ. गडाख

व्यावसायिक शेती व शेतीपूरक उद्योगधंद्यांची शहरांपर्यंतची जोड साखळी निर्माण केल्यास गावात निर्माण होणाऱ्या कच्च्या मालावर गावातच प्रक्रिया होऊन पक्का माल शहरातील ग्राहकांना उपलब्ध होईल. पर्यायाने रोजगार निर्मिती होत शहरांकडील स्थलांतर कमी होण्यास मदत होईल असेही कुलगुरू डॉ. शरद गडाख म्हणाले. मॉडेल व्हिलेज निर्मितीसाठी सर्व शासकीय, निमशासकीय, सहकारी, सेवाभावी, खासगी विभागानी एकत्रित येत एकात्मिक प्रयत्नांची मोट बांधणे गरजेचे असल्याचे सांगितले.