Nashik News : दिवाळीनंतर तापमानात घट होत असल्याने थंडीमुळे गारठा वाढला असून हुडहुडी भरू लागली आहे. जिल्ह्यात चालू वर्षीच्या थंडीत सर्वांत नीचांकी तापमान कुंदेववाडी (ता. निफाड) येथील कृषी संशोधन केंद्र येथे बुधवारी (ता. २०) १०.९ अंश सेल्सिअस नोंदवले गेले.

त्यामुळे एकीकडे दिवसा उन्हाचा चटका कायम असून रात्री तापमानात घसरण होत असल्याचे दिसून येत आहे. ऑक्टोबरअखेर कमाल तापमान ३३ अंश सेल्सिअसवर होते.

त्यात चढउतार होत आहे. मात्र त्यानंतर किमान तापमानात घसरण होत असल्याचे दिसून आले. यापूर्वी सोमवारी (ता. ११) १२.२ पर्यंत सुरुवातीला तापमान कमी झाले होते. मात्र त्यानंतर पुन्हा त्यात चढ-उतार झाला.

तर बुधवारी (ता. १३) पारा थेट ११.८ अंशांपर्यंत घसरला. दिवाळीनंतर सर्वांत कमी तापमानाची नोंद झाली होती. त्यात पुन्हा वाढ होऊन तापमान १५ अंशांवर गेले. तर पुन्हा पारा १० अंशांपर्यंत खाली आल्याने सध्या थंडीत वाढ झाली आहे.

ऑक्टोबरमध्ये मॉन्सूनोत्तर पावसाने जिल्ह्यात सर्वदूर जोरदार हजेरी लावली. त्यामुळे शेतकऱ्यांची धावपळ उडाली होती.

त्यातच दिवाळीनंतर वातावरणात बदल होऊन थंडी वाढल्‍याची स्थिती आहे. दिवसा कडक ऊन तर सायंकाळनंतर मात्र वातावरणात गारवा जाणवू लागला आहे.