Pune News : दौंड तालुका कृषी उत्पन्न बाजार समितीच्या दौंड मुख्य बाजारात बाजरीची आवक वाढली असून, बाजारभावात प्रतिक्विंटल शंभर रुपयांची वाढ झाली आहे. बाजरीची ६६४ क्विंटल आवक झाली असून, त्यास प्रतवारीनुसार किमान २१०० तर कमाल ३६०० रुपये प्रतिक्विंटल बाजारभाव मिळाला आहे.

मागील आठवड्यात बाजरीची ४९१ क्विंटल आवक झाली होती. त्यास प्रतवारीनुसार कमाल ३५०० रुपये प्रतिक्विंटल असा बाजारभाव मिळाला होता. दौंड मुख्य बाजारासह पाटस व यवत येथील उपबाजारांमध्ये भुसार मालाची आवक स्थिर असून, बाजारभाव तेजीत आहेत.

केडगाव उपबाजारात भुसार मालाची आवकमध्ये वाढ असून बाजारभाव तेजीत आहे. दौंड मुख्य बाजारात भाजीपाल्याची आवक स्थिर असून बाजारभाव तेजीत आहे.

बटाटा व भेंडीच्या बाजारभावात वाढ

तालुक्यात बटाट्याची २६० क्विंटल आवक झाली असून, प्रतिदहा किलोसाठी किमान २४०, तर कमाल ३०० रुपये असा दर मिळाला. भेंडीची ३१ क्विंटल आवक झाली असून, प्रतिदहा किलोसाठी किमान १००, तर कमाल ५५० रुपये असा दर मिळाला.

कांद्याच्या दरात दोनशे रुपयांची वाढ

केडगाव उपबाजारात कांद्याची आवक घटली असून दरात प्रतिक्विंटल दोनशे रुपयांची वाढ झाल्याने कांदा उत्पादकांना दिलासा मिळाला आहे. कांद्याची २६२० क्विंटल आवक झाली प्रतवारीनुसार किमान ८००, तर कमाल ६८०० प्रतिक्विंटल असा बाजारभाव मिळाला.