Pune News : अमरावती जिल्ह्यातील चिखलदरा, धारणी, परतवाडा, अंजगाव सुर्जी तालुक्यातील अनेक भागांना सोमवारी (ता. ३०) भूकंपाचे सौम्य धक्के बसले. यामुळे नागरिकांमध्ये भीतीचे वातावरण पसरले. तर घरातील वस्तू हालू लागल्याने नागरिकांनी घराबाहेर धाव घेतली. सुदैवाने भूकंप सौम्य धक्क्यांचा असल्याने वित्त किंवा जीवित हानी झालेली नाही.

अमरावती जिल्ह्यातील चिखलदरा, धारणी, परतवाडा, अंजनगाव सुर्जी तसेच मेळघाटातील काही गावांमध्ये भूकंपाचे रविवारी रात्री १ वाजून ४५ मिनिटांनी भूकंपाचे धक्के जाणवले. या भूकंपाची तीव्रता ४.२ रिश्टर स्केल इतकी नोंदवण्यात आली.

भूकंपाचे केंद्र अचलपूरपासून ४०० मीटर दूर असल्याची माहिती प्रशासनाने दिली आहे. तर केंद्राच्या जवळ असणाऱ्या अचलपूर आणि परतवाडा या शहरांमध्ये सर्वाधिक भूकंपाचे धक्के जाणवले.

दरम्यान अचलपूर, अंजनगाव सुर्जी., चिखलदरा, धारणी या तालुक्यांसह मेळघाटातील अनेक गावांमध्ये भूकंपामुळे खळबळ उडाली. चिखलदरा तालुक्यातील अनेक गावातील लोक हादऱ्यांमुळे घराबाहेर पडले. तसेच भूकंपाचे सौम्य प्रकारचे धक्के लागल्याने नागरिकांमध्ये भीतीचे वातावरण निर्माण झाले आहे.

वित्त किंवा जीवित हानी नाही

अमरावती जिल्ह्यात झालेला भूकंप हा सौम्य होता. यामुळे येथे कोणत्याही प्रकारची वित्त किंवा जीवित हानी झालेली नाही. पण या भूकंपाची चर्चा सोशल मीडियावर होत आहे.