Pune News : तालुक्याच्या पूर्व भागात ऊस तोडणी झाल्यानंतर मोकळ्या झालेल्या रानात मका पेरणीला वेग आला आहे. जानेवारी महिन्याच्या अखेरपर्यंत रब्बी हंगामातील पिके घेतली जातात. या परिसरात सध्या मका पिकांबरोबरच गहू, हरभरा, कांदा लागवड, ऊस लागवड, सोयाबीन, सूर्यफूल, भुईमूग, कलिंगड, टरबूज इत्यादी पिकांच्या पेरण्या आणि लागवडी सुरू आहेत.

दौंडमध्ये दमदार पाऊस झाल्यामुळे पाण्याची उपलब्धता चांगली आहे. त्यामुळे यंदा रब्बीतील पेरण्यांनी गती घेतली आहे. शेतकरी ऊस तोडणीनंतर लागवडी करतात, त्यामुळे जानेवारी अखेरपर्यंत पेरण्या होतील. धान्यासाठीच्या म्हणजे उत्पन्नासाठी मका पेरणीकरिता हेक्टरी १५ ते २० किलो तर चाऱ्यासाठीच्या मका पेरणीसाठी हेक्टरी ७५ किलो बियाणे लागते.

दुग्ध व्यवसायामुळे मका लागवडीकडे कल

दौंड तालुक्याच्या पूर्व भागातील राजेगाव परिसरातील शेतकरी हा शेती बरोबरच जोडधंदा म्हणून प्रामुख्याने दुग्ध व्यवसाय करत आलेला आहे. त्यामुळे जनावरांना चारा म्हणून मोठ्या प्रमाणावर मका उत्पादन घेतले जाते. काही जण उत्पन्नासाठी मका करतात. तर अलीकडच्या काळात राजेगाव आणि खानवटे या परिसरात मुरघास तयार करण्यासाठी मोठ्या प्रमाणावर मका हे पीक घेतले जात आहे.

इथेनॉलसाठी मक्याला मागणी

ऊसतोडणी होईल तसे उशिराने मका, हरभऱ्यासह अन्य चारा पिकांची लागवड जानेवारी अखेरपर्यंत होत असते. त्यामुळे साहजिकच मका लागवडीने मोठी गती घेतली आहे. इथेनॉलसाठी मक्याला मागणी वाढल्यामुळे दर २५ ते ३० रुपये किलोपर्यंत गेल्याचा परिणाम मका लागवडीवर झाला आहे. बारामती परिसरात पशुखाद्य कारखान्यात मकेला मागणी आहे.

यासाठी मका उत्पादन घ्यायचे

जनावरांचा चारा

उत्पन्न

मुरघास