MahaVistaar App Rolled Out :

कृषी विभागाने शेतकऱ्यांसाठी कृत्रिम बुद्धिमत्ता आधारित महाविस्तार मोबाईल अॅप लॉच केलं आहे. यशवंतराव चव्हाण प्रतिष्ठान येथे आयोजित कृषी विभागाच्या खरीप आढावा बैठकीत मुख्यमंत्री देवेंद्र फडणवीस बुधवारी (ता.२१) यांनी या अॅपचं उद्घाटन केलं. महाविस्तार अॅपमधून शेतकऱ्यांना शेतीपूरक माहिती मिळणार आहे. या अॅपच्या मदतीने शेतकऱ्यांना ऑडिओ आणि व्हिडिओ पद्धतीने शेती पूरक मार्गदर्शन करण्यात येणार असल्याचं मुख्यमंत्री देवेंद्र फडणवीस यांनी सांगितलं.

महाविस्तार अॅपचं वैशिष्ट्य काय? (What are the features of the Mahavistar app?)

महाविस्तार अॅप कृत्रिम बुद्धिमत्तेवर आधारित आहे. यामध्ये शेतकऱ्यांसाठी मराठी भाषेतील चॅटबॉट देण्यात आला आहे. या चॅटबॉटला शेतकरी प्रश्न विचारू शकतात. त्याची उत्तरं चॅटबॉट काही सेकंदात शेतकऱ्यांना देतो. त्यामुळे शेतकऱ्यांना शेती कामात मदत होईल, असा दावा राज्य सरकारकडून करण्यात येत आहे.

कोणती माहिती मिळणार?(What information will be available on Mahavistar App?)

हवामान बदलाच्या संकटामुळे शेतकऱ्यांसमोर नवनवीन आव्हाने निर्माण होऊ लागली आहेत. त्यामुळे हवामान बदलांना तोंड देण्यासाठी कृत्रिम बुद्धिमत्तेचा पर्याय उपयुक्त ठरू शकतो, असं जाणकार सांगतात. महाविस्तार अॅपमध्ये हवामान अंदाज, शेतीतील लागवड, लागवडीची पद्धत, कीड व्यवस्थापन, कीड व्यवस्थापनाच्या पद्धती, बाजारभाव, पीक व्यवस्थापन, खतांचा वापर, पीक सल्ला, मृदा आरोग्य, गोदाम व्यवस्था आणि डीबीटीवरील योजनांची माहिती या अॅपवर मिळते.

महाविस्तार अॅपचा चॅटबॉट अचूक उत्तर देत असल्याचा दावा मुख्यमंत्री फडणवीस यांनी केला आहे. तसेच चॅटबॉटवर शेतकऱ्यांच्या सर्व समस्यांचं उतर अचूक मिळतं, असं कृषी विभागाने सांगितलं आहे. त्यामुळे पुढील काळात शेतकऱ्यांच्या व्हाट्सअॅपवर देखील महाविस्तारचा चॅटबॉट उपलब्ध करून देण्याच्या सूचना मुख्यमंत्री फडणवीस यांनी कृषी सचिवांना केल्या आहेत. जेणेकरून शेतकऱ्यांना हवामान अंदाज, कृषी सल्ला, बाजारभाव व्हाटसअॅपवरून पाहता येतील.

महाविस्तार अॅप कसं वापरावं?(How to use the Mahavistar app?)

महाविस्तार अॅप प्ले स्टोअरवर उपलब्ध आहे. शेतकऱ्यांनी मोबाईलमधील प्ले स्टोअरवर जाऊन MahaVistar App असं सर्च करावं. महाविस्तार अॅप मोबाईलमध्ये इन्सटॉल करावं. त्यानंतर अॅपवर नोंदणी करून लॉगिन आयडी तयार करून घ्यावा. लॉगिन आयडी तयार झाल्यानंतर शेतकरी लॉगिन वापरुन महाविस्तार अॅपचा वापर करू शकते.

चॅटबॉट म्हणजे काय? ( What is a chatbot?)

चॅटबॉट एक संगणकीय प्रणाली आहे. यामध्ये संवाद करण्याची क्षमता विकसित करण्यात आलेली असते. हा संवाद मजकुराद्वारे किंवा आवाजाद्वारे केला जातो. चॅटबॉट्सचा उपयोग विविध सेवा देण्यासाठी, प्रश्नांची उत्तरे देण्यासाठी, मदत करण्यासाठी किंवा विशिष्ट कामं पूर्ण करण्यासाठी केला जातो. रूल बेस्ड आणि एआय बेस्ड चॅटबॉट दोन प्रकार आहेत. महाविस्तार चॅटबॉट एआय बेस्ड आहे. यामध्ये वेळ आणि श्रम वाचतो. तसेच शेतकऱ्यांना २४/७ सेवा मिळते. एकाच वेळी हजारो लोकांना सेवा देण्याची क्षमता असते.