Pune News : येथील महात्मा फुले बाजारात सुमारे एक लाख कोथिंबिरीच्या जुड्यांची आवक झाली. कोथिंबिरीची आवक अधिक असली तरी एका जुडीला अगदी एक, दोन, तीन रुपये भाव मिळाला. उठाव नसल्याने कोथिंबिरीचे भाव घसरले आणि कोथिंबीर मातीमोल झाली.

उत्पादन खर्च व भाडे वसूल न झाल्याने शेतकऱ्यांनी कोथिंबिरीचे ढीग तसेच बाजारात टाकून दिले. त्यातून कोणी कोथिंबीर फुकट नेली तर कोथिंबिरीच्या ढिगावर अगदी शेळ्या, मेंढ्यांनी ताव मारला. खेड तालुक्यात कांदा, बटाट्याची काढणी झाल्यानंतर काही शेतकरी कोथिंबिरीचे पीक घेतात.

परंतु यावर्षी ऊन तापले असूनही कोथिंबिरीची आवक मोठ्या प्रमाणात आहे तर दर घसरत आहेत. कोथिंबिरीचे भाव अगदी एक रुपयापासून दोन, तीन रुपयांवर आले आहेत.

पुणे, मुंबई, पिंपरी -चिंचवड परिसरात चाकण परिसरातून कोथिंबीर विक्रीसाठी जाते. उठाव कमी असल्याने कोथिंबिरीचे भाव घसरत असल्याचे शेतकरी, विक्रेत्यांनी सांगितले.

दरम्यान खेड कृषी उत्पन्न बाजार समितीचे सभापती कैलास लिंभोरे, सचिव बाळासाहेब धंद्रे यांनी सांगितले की, उन्हाळ्याचे दिवस असले तरी सध्या बाजारात कोथिंबिरीची आवक मोठी आहे व उठाव कमी आहे.

त्यामुळे कोथिंबिरीचे भाव घसरत आहेत. शेतकऱ्यांचा उत्पादन खर्च, भाडे खर्चही वसूल होत नाही. त्यामुळे शेतकरी ढीग तसेच टाकून जात आहेत.