Nanded News : एक ते पाच सप्टेंबर दरम्यान अतिवृष्टी झाली होती. शेतकऱ्यांचे मोठे नुकसान झाले होते. तालुका प्रशासनाने जिल्हा प्रशासनाला अंदाजे पाच हजार हेक्टरहून अधिक पिकांचे क्षेत्र बाधित झाले असे दाखवले होते. शेतकऱ्यांनी प्रशासनाच्या विरोधात रस्त्यावर उतरून तहसील कार्यालयावर मोर्चा काढला होता.

बोळसा ग.प. येथे साखळी उपोषण केले होते. शेतकऱ्यांच्या या आंदोलनांना यश आले असून महसूल विभागाने नुकत्याच झालेल्या अतिवृष्टीत आता पाच हजारऐवजी २४ हजार ४६ हेक्टर एवढे शेतीचे क्षेत्र बाधित झाल्याचे दाखविले आहे. त्यामुळे तालुक्यातील बहुतांशी शेतकऱ्यांना अनुदानाचा लाभ मिळणार आहे.

गोदावरी काठचा शंभर टक्के भाग व उर्वरित ७० टक्के शेतीचे क्षेत्र बाधित दाखविण्यात आले. त्यामुळे तालुक्यातील बहुतांश शेतकऱ्यांना अतिवृष्टीचे अनुदान मिळणार आहे. नुकसानीपोटी तालुक्याला जवळपास ३५ कोटी एवढे अनुदान मिळू शकते.

यापूर्वी महसूल विभागाने फक्त ५ हजार २९ हेक्टर एवढे क्षेत्र अतिवृष्टीमध्ये बाधित दाखविले होते. नुकत्याच झालेल्या अतिवृष्टीमुळे गोदावरी काठचा संपूर्ण भाग तसेच इतर भागातही नुकसान झाले. सोयाबीन, कापूस, तूर, मूग, उडीद, ज्वारी, ऊस आदी पिकांचे यात नुकसान झाले.

मात्र, नुकसान दाखविताना महसूल विभागाने अगोदर हे क्षेत्र अत्यंत कमी दाखविले होते. अनेक शेतकऱ्यांना याचा फटका बसणार होता. यामुळे बोळसा गंगापट्टी येथील महादेव मंदिरात पूरग्रस्त शेतकऱ्यांनी साखळी उपोषण केले. तसेच, तहसील कार्यालयावर मोर्चा देखील काढण्यात आला होता. याची दखल प्रशासनाने आता घेतल्याने अनेक शेतकऱ्यांना दिलासा मिळणार आहे.