Parbhani News : शेतमाल तारणकर्ज योजनेअंतर्गत परभणी, हिंगोली जिल्ह्यात यंदा (२०२३-२४ ) सोमवार (ता. ५)पर्यंत परभणी, सेलू, मानवत, पाथरी व हिंगोली जिल्ह्यातील जवळा बाजार या ५ कृषी उत्पन्न समित्या अंतर्गंत ११२ शेतकऱ्यांनी ५ हजार ५१७ क्विंटल शेतमाल तारण ठेवला असून शेतकऱ्यांना १ कोटी ८३ लाख ७७ हजार ७४० रुपये कर्ज वितरित करण्यात आले आहे. तारण शेतमालाची किंमत २ कोटी ४७ लाख ७६ हजार ९९५ रुपये आहे, अशी माहिती पणन मंडळाच्या सूत्रांनी दिली.

राज्य पणन मंडळअंतर्गत शेतमाल तारण कर्ज योजनेत शेतमालाच्या किमतीच्या ७५ टक्के कर्ज ६ टक्के व्याज दराने दिले जाते. परभणी, मानवत या कृषी उत्पन्न बाजार समित्या स्वनिधीतून तर सेलू व पाथरी कृषी उत्पन्न बाजार समिती पणन मंडळाच्या अर्थसहाय्याने ही योजना राबवीत आहेत.

या योजनेत सोमवार (ता. ५) पर्यंत परभणी जिल्ह्यातील १०१ शेतकऱ्यांनी सोयाबीन व हळद मिळून ५ हजार २ क्विंटल शेतमाल तारण ठेवला असून २ कोटी २५ लाख ३४ हजार ३३५ रुपये किमतीच्या या शेतमालावर १ कोटी ६६ लाख ९९ हजार ७४० रुपये कर्ज वाटप करण्यात आले आहे.

पणन मंडळाने सेलू बाजार समितीला ५ लाख ३४ हजार ४०० रुपये तर पाथरी बाजार समितीला २६ लाख ४४ हजार १०० रुपये रक्कम प्रतिपूर्ती केली आहे. हिंगोली जिल्ह्यातील जवळा बाजार (ता. औंढा नागनाथ) बाजार समिती अंतर्गंत ११ शेतकऱ्यांनी तारण ठेवलेल्या सोयाबीन व गहू मिळून एकूण ५१५.६८ क्विंटल शेतमालावर १६ लाख ७८ हजार ५० रुपयाचे कर्ज वाटप केले आहे. पणन मंडळाची प्रतिपूर्ती केलेली रक्कम ७ लाख ४४ हजार १८८ रुपये आहे.

तारण कर्ज घेण्याकडे शेतकऱ्यांचा कल कमी

परभणी व हिंगोली जिल्ह्यातील १७ पैकी केवळ ५ कृषी उत्पन्न बाजार समित्या शेतमाल तारण योजना राबवीत आहेत. सोयाबीनच्या दरात घसरण झाली आहे. भविष्यात तेजीची चिन्हे दिसत नाहीत. त्यामुळे सोयाबीनवर तारण कर्ज घेण्याकडे शेतकऱ्यांचा फारसा कल दिसत नाही. तूर्त शेतमाल तारण कर्ज योजनेला शेतकऱ्यांचा कमी प्रतिसाद असल्याचे चित्र आहे.

शेतमाल तारण कर्ज स्थिती

(वजन क्विंटलमध्ये रक्कम लाख रुपये)

बाजार समिती शेतकरी संख्या तारण शेतमाल वजन एकूण किंमत कर्ज रक्कम

परभणी ३७ १७५५ ७८.९४ ५९.२०

मानवत ३४ १२९५ ५९.२२ ४३.२४

सेलू ५ १९५ ८.२३ ५.३४

पाथरी २५ १७५५ ७८.९४ ५९.२०

जवळा बाजार ९ ५१५ २२.४२ १६.७८