Ahilyanagar News : जामखेड शहर आणि परिसरातील नागरिक गेल्या काही दिवसांपासून बिबट्याच्या धास्तीने त्रस्त आहेत. शहरापासून जवळ असलेल्या भुतवडा परिसरात बिबट्याचा मुक्त वावर सुरू आहे.

त्यामुळे शेतकरी तसेच ग्रामस्थांत भयभीत झाले आहेत. तातडीने बिबट्याला पकडण्याची मागणी लोकांनी केली आहे. जामखेड शहरालगत भुतवडा तलाव आहे. या भागात दोन दिवसांपूर्वी तीन बिबट्यांनी एका गाईचा फडशा पाडला होता. त्यामुळे या परिसरात बिबट्याची दहशत पसरली आहे.

त्यापूर्वी मोहा, साकत घाट या परिसरात अनेकांना बिबट्या आढळून आला होता. सध्या या भागात रब्बीची पिके असल्याने बिबट्याला लपण्याला जागा आहे. शिवाय परिसरात डोंगर आहे. या भागात गेल्या अनेक दिवसांपासून बिबट्याचा वावर सुरू आहे.

पलिकडे बीड जिल्ह्यातील अनेक भागांत बिबट्या सातत्याने दिसून येतो. काही दिवसांपूर्वी तालुक्यातील डोंगरात मोहा, साकत घाटात अनेकांना बिबट्या दिसला. त्यामुळे या भागात बिबट्याची दहशत बसली आहे.

दोन दिवसांपूर्वी वन विभागाच्या अधिकाऱ्यांनी भुतवडा परिसरासह खैरी मध्यम प्रकल्प, खर्डा परिसराचीही पाहणी केली. लोकांनी बिबट्याचा बंदोबस्त करण्याची मागणी केली असून, पिंजरा लावण्यासाठी वरिष्ठ कार्यालयाला प्रस्ताव पाठविणार आहोत. मात्र जनतेने काळजी घ्यावी, असे आवाहन वन विभागाने केले आहे.