Leopard Cages Funds : ‘डीपीडीसी’तून बिबट्याच्या पिंजऱ्यांसाठी निधी देणार

Pune News : उत्तर पुणे जिल्ह्यातील जुन्नर, खेड, आंबेगाव यासह शिरूर-हवेली या तालुक्यांमध्ये गेल्या काही महिन्यांत बिबट्याचा वावर वाढला आहे. यातून शेतकऱ्यांवर हल्ल्यासारख्या दुर्घटनाही घडल्या आहेत. याकरिता तातडीने उपाययोजना म्हणून बिबटे पकडण्यासाठी ३०० पिंजरे खरेदी करण्यासाठी जिल्हा नियोजन समितीद्वारे विशेष निधी तातडीने उपलब्ध करून दिला जाईल,

त्यानुसार उपाययोजना करण्याचे निर्देश उपमुख्यमंत्री अजित पवार यांनी जिल्हा वनविभाग अधिकारी महादेव मोहिते यांना दिल्याची माहिती आमदार ज्ञानेश्‍वर कटके यांनी दिली.

मुंबई येथे शिरूर-हवेली मतदार संघातील विविध मुद्यांबाबत आमदार कटके यांनी उपमुख्यमंत्री पवार यांना नुकतेच निवेदन सादर केल्यानंतर तातडीची बाब म्हणून विशेष बैठक घेतली. या वेळी उपमुख्यमंत्री पवार यांनी निर्देश दिले आहेत. या वेळी वनविभाग, महावितरण विभागाचे अधिकारी उपस्थित होते.

शेतकऱ्यांना दिवसा थ्री फेज वीज मिळणार :

बिबट्यांचे मानवांवर हल्ले वाढत आहेत. हे हल्ले रोखण्यासाठी ठोस उपाययोजनांबाबत उपमुख्यमंत्री अजित पवार यांची भेट घेत समस्या मांडली. वनविभागाने बिबटे पकडण्यासाठी ३०० पिंजऱ्यांची खरेदी करावी. तसेच बिबट्या निवारा केंद्राची क्षमता तीन महिन्यांत १०० बिबट्यांची करावी. महावितरणने शेतकऱ्यांना दिवसा थ्री-फेज विद्युत पुरवठा करावा, आदी कामांना मंजुऱ्या देण्याचे निर्देश पवार यांनी दिले असल्याचे कटके यांनी सांगितले.