Parbhani News : वसंतराव नाईक मराठवाडा कृषी विद्यापीठ आणि आयएमसी (IMC) चेंबर ऑफ कॉमर्स अँड इंडस्ट्री, मुंबई यांच्यात मराठवाडा विभागातील कृषी व्यापार व गुंतवणूक क्षेत्रात सहकार्य वाढविण्यासाठी सामंजस्य करार बुधवारी (ता. ९) करण्यात आला.

मुंबई येथील आयएमसी भवनातील वालचंद हिराचंद सभागृहात आयोजित आयएमसी वाणिज्य व उद्योग मंडळाच्या ११७ व्या वार्षिक सर्वसाधारण सभेमध्ये हा करार करण्यात आला. वसंतराव नाईक मराठवाडा कृषी विद्यापीठाचे कुलगुरू डॉ. इंद्रमणी मिश्रा, मुख्यमंत्री यांचे आर्थिक सल्लागार व ‘महाराष्ट्र इन्स्टिट्यूट फॉर ट्रान्सफॉर्मेशनचे (MITRA) मुख्य कार्यकारी अधिकारी प्रवीण परदेशी प्रमुख पाहुणे म्हणून उपस्थित होते.

हा करार परस्पर समता व परस्पर हित यावर आधारित आहे. त्यानुसार दोन्ही संस्थांमध्ये स्थानिक शेतकऱ्यांचे उत्पन्न वाढविण्यासाठी पीक निवडीत मार्गदर्शन, शेती पिकांपासून मूल्यवर्धित उत्पादने तयार करणे, बाजारपेठेची ओळख व मागणीनुसार उत्पादने सुधारित करणे, परभणी जिल्ह्यातील कृषी उत्पादनांचे राष्ट्रीय व आंतरराष्ट्रीय प्रदर्शनात सादरीकरण, गुंतवणूकदार व खरेदीदारांना शास्त्रज्ञ व उत्पादकांशी थेट संपर्क साधण्यासाठी सुविधा, विद्यापीठातील तांत्रिक प्रगतींचे व्यावसायिकरण, विद्यार्थ्यांसाठी रोजगार व उद्योजकतेच्या संधी निर्माण करणे आदी क्षेत्रांत परस्पर सहकार्य करणार आहेत.

या करारामध्ये हळद, सोयाबीन, ज्वारी, ऊस, तूर, हरभरा, ड्रॅगन फ्रूट, मिरची, मोरिंगा, कापूस, दूध व अंडी उत्पादनातील गुणवत्ता सुधारणा, अन्नप्रक्रिया व पोषणयुक्त पदार्थनिर्मिती अशा विविध क्षेत्रांतील ३२ उत्पादने, प्रकल्पांचा समावेश करण्यात आला आहे. या करारावर कुलगुरू डॉ. इंद्रमणी मिश्रा आणि आयएमसी चेंबर ऑफ कॉमर्स अँड इंडस्ट्रीतर्फे अध्यक्ष व ओम्नीॲक्टिव्ह टेक्नॉलॉजिजचे व्यवस्थापकीय संचालक संजय मारीवाला यांनी स्वाक्षरी केली.

या वेळी आयएमसीच्या इलेक्ट अध्यक्ष सुनीता रामनाथकर, इलेक्ट उपाध्यक्ष एम. के. चौहान, महासंचालक अजित मंगरूळकर, एफ टू एफ कॉर्पोरेट कन्सल्टंट प्रा.लि.चे मुख्य कार्यकारी अधिकारी तथा असोचॅमचे सह-अध्यक्ष डॉ. उमेश कांबळे यांची उपस्थिती होती.