Amaravati News : लाडकी बहीण योजनेने आनंदाचा शिधा व शिवभोजन थाळी या योजना अडचणीत आल्या आहेत. आर्थिक तरतूद नसल्याने या दोन्ही योजना आगामी काळात बंद होण्याचे संकेत मिळू लागले आहेत. यंदा गणेशोत्सवात शिधापत्रिकाधारकांना आनंदाचा शिधा मिळणार नाही, तर शिवभोजन थाळी योजनेच्या रकमेत मोठ्या प्रमाणावर कपात करण्यात आली आहे.

एकनाथ शिंदे मुख्यमंत्री असताना आनंदाचा शिधा योजना प्रारंभ करण्यात आली होती. रेशनवर धान्य मिळणाऱ्या अंत्योदय व प्राधान्य गटातील कार्डधारकांना हा शिधा देण्यात येत होता. गणेशोत्सव, दिवाळी व गुढीपाडवा, अशा तीन सणासुदीला शंभर रुपयांमध्ये आनंदाचा शिधा मिळत होता.

यामध्ये साखर, गोडेतल, रवा, पोहे व डाळ असे धान्य प्रत्येकी एक किलो मिळायचे. यंदा २७ ऑगस्टपासून गणेशोत्सव आहे. कार्डधारक आनंदाच्या शिधाची प्रतीक्षा करू लागले असताना त्यांना तो मिळणार नसल्याचे सांगण्यात आले आहे.

अमरावती जिल्ह्यात पाच लाख २ हजार ५४२ कार्डधारक आहेत. यापैकी अंत्योदय गटात १ लाख २८ हजार २०७ कार्डधारक व प्राधान्य गटात ३ लाख ७४ हजार ३३५ कार्डधारक आहेत. यापूर्वी या कार्डधारकांना जूनमध्ये एकाच वेळी तीन महिन्यांचे धान्य वितरित करण्यात आले आहे. आता त्यांना सप्टेंबरमध्ये धान्य वितरित केले जाणार आहे.

अशातच आनंदाचा शिधादेखील बंद करण्यात आला आहे. या योजनेमुळे राज्य सरकारला करावी लागणारी आर्थिक तरतूद लाडकी बहीण योजनेमुळे करता आलेली नाही. २६ जानेवारी २०२० पासून राज्यात गरीब व गरजू जनतेला स्वस्त दरात शिवभोजन थाळी देण्याची योजना सुरू केली. या योजनेसाठी १२० कोटी रुपये पुरवठा विभागास मिळत होते, त्यामध्ये शंभर कोटींनी कपात करण्यात आली आहे.