Jalgaon News : खानदेशात खरिपातील किंवा पावसाळी कलिंगडाची लागवड सुरूच आहे. अनेक शेतकऱ्यांनी या महिन्याच्या सुरुवातीला लागवड केली आहे. यंदा नंदुरबारात लागवड कमी झाल्याची माहिती असून, खानदेशातील एकूण क्षेत्र १५० ते २०० हेक्टरवर राहील, असा अंदाज आहे.

खानदेशात खरिपातील कलिंगडाची लागवड कमी केली जाते. जळगाव जिल्ह्यात जामनेर तालुका कलिंगड लागवडीत आघाडीवर आहे. त्यापाठोपाठ चोपडा, जळगाव, यावल, मुक्ताईनगर, नंदुरबारातील तळोदा, शहादा भागात कलिंगडाची लागवड केली जाते.

कलिंगडास अखेरच्या १५ ते २० दिवसात अधिकचे पाणी सिंचनासाठी लागते. रोज पाच ते सहा तास सिंचन करावे लागते. यामुळे कमी-अधिक पावसाच्या भीतीने कलिंगडाची लागवड यंदा कमी होईल, अशी स्थिती आहे.

परंतु चोपडा, यावल भागांत लागवड स्थिर राहणार आहे. जामनेरातील लागवडही स्थिर आहे. अनेक शेतकरी जुलैच्या मध्यात लागवड करतात. लागवडीसाठी काही शेतकरी रोपांचा उपयोग करीत आहेत. तर काही शेतकरी बियांची लागवड करीत आहेत.

धुळ्यात धुळे, शिरपूर भागांत काही शेतकरी लागवड करतात. धुळ्यातही क्षेत्रात मोठी घट किंवा वाढ झालेली नाही. जळगाव व धुळ्यात मिळून सुमारे १५० ते २०० हेक्टरवर कलिंगडाचे पीक असणार आहे. त्याची लागवड ऑगस्टपर्य़ंत केली जाईल. नंदुरबारात मागील हंगामात सुमारे २५ हेक्टरवर खरिपातील कलिंगडाची लागवड झाली होती.

परंतु यंदा तेथील लागवड सुमारे पाच ते सहा हेक्टरने कमी होणार आहे. कलिंगडाचे पीक नाजूक व अधिक श्रमाचे आहे. त्यात दैनंदीन विद्राव्य खते, आवश्यकतेनुसार एक दिवसाआड फवारणी घ्यावी लागते. यामुळे मोठे बागायतदार शेतकरी कलिंगड पिकापासून दूर आहेत. लहान, मध्यम शेतकऱ्यांनी आपल्याकडील जलसाठ्याच्या उपलब्धतेनुसार कलिंगडाची लागवड केली आहे.