Kolhapur News : कृषी व्यवस्थापन यंत्रणा (आत्मा)च्या वतीने करवीर तालुक्यात बंदीस्त खेकडा पालन करण्यासाठी प्रोत्साहन देण्यात येत आहे. भाटणवाडी (ता. करवीर) येथे कृषी तंत्रज्ञान व्यवस्थापन यंत्रणा आत्मा अंतर्गत ग्रामीण भागातील शेतकऱ्यांना बंदिस्त खेकडा पालन करण्यासाठी प्रवृत्त करण्यात येत आहे. या अंतर्गत आत्म्याच्या माध्यमातून प्रथमतः २० शेतकऱ्यांना खेकडा पालनासाठी खेकड्याचे पिलं देण्यात येणार आहेत.

काळ्या पाठीचा खेकड्याच्या बंदिस्त पालनासाठी घरच्या पाठीमागील जागेत पेपर बॅग वापरून खेकड्यांना त्यात त्याचा नैसर्गिक अधिवास तयार करून चांगल्या प्रकारे खेकडा उत्पादन घेतले जाते. सामूहिक पद्धतीने खेकडा पालन केले, तर सर्व शेतकऱ्यांच्या कडून एकत्रितरीत्या खेकडा गोळा करून पुणे, मुंबई गोवा येथे विक्री करून आर्थिक नफा मिळवून देण्यास मदत होणार आहे.

खेकडा पालन गटाचे अध्यक्ष कृष्णात पाटील यांच्या पुढाकाराने खेकडा पालन शेतीपूरक व्यवसाय करण्यासाठी भाटणवाडी, कांचनवाडी, सोनाळी, हसूर येथील १५ शेतकऱ्यांनी हा शेतीपूरक व्यवसाय सुरू करण्यासाठी तयारी केली आहे.

खेकडा पालन केलेल्या शेतकऱ्यांना ‘आत्मा’च्या पदाधिकाऱ्यांसह शेतकऱ्यांनी नुकतीच भेट दिली. सहाय्यक कृषी अधिकारी पल्लवी रणवरे, ‘आत्मा’चे निखिल कुलकर्णी, कृष्णात पाटील, संजय भोसले, श्रीकांत पाटील, सरिता पाटील, विलास हातकर आदि यावेळी उपस्थित होते.