Pune News: इस्त्राईल आणि इराण यांच्यातील युध्दाची स्थिती आणखी चीघळल्यास इराणमध्ये पुरवठा साखळी विस्कळीत होऊ शकते आणि पेमेंटची समस्या निर्माण होऊ शकते. यामुळे भारतातून इराणला होणाऱ्या शेतीमालाच्या निर्यातीवरही परिणाम होऊ शकतो.

भारतातून इराणला सोयापेंड, बासमती तांदूळ, हरभरा, साखर, शेंगदाणा, तीळ तसेच हळद आणि जिऱ्यासारख्या मसाल्यांची निर्यात होत असते. भारत जगातील सर्वात मोठा तांदूळन निर्यातदार देश आहे. मागील काही वर्षात भारताची बासमती तांदळाची निर्यातही वाढली आहे.

इराण हा भारताच्या बासमती तांदळाचा मोठा ग्राहक आहे. पण सध्या सुरु असलेली युध्दाची स्थिती आणखी चिघळली आणि जास्त काळ चालली तर बासमतीच्या निर्यातीवर परिणाम होऊ शकतो, पेमेंटही उशीरा मिळू शकते, अशी भीती निर्यातदारांनी व्यक्ती केली.

त्यामुळे इराणसोबतच्या व्यापारात अडथळे निर्माण झाल्यास भारतालाही फटका बसू शकतो.
इराणला भारतातून सोयापेंडचीही मोठ्या प्रमाणात निर्यात होत असते. भारताने २०२४-२५ या आर्थिक वर्षात इराणला १ लाख ३८ हजार टन सोयापेंडची निर्यात केली होती.

तर चालू हंगामात ऑक्टोबर ते मे दरम्यान २३ हजार टनांचीच निर्यात झाली आहे. मागील २ महिन्यात निर्यात घटली आहे. आता युध्दाने समस्या वाढल्या तर सोयापेंड निर्यातीवर आणखी परिणाम होऊ शकतो. 

इराणला शेतीमालाची निर्यात (टनांमध्ये)

शेतीमाल…२०२३-२४…२०२४-२५
तांदूळ…६८५९०४…८६३५४९
साखर…५४३१…२२१९४
शेंगदाणा…११५८५…९८२२
हळद…५४४४…८०५८
सोयापेंड…३११६३८…१३८८१५
काबुली हरभरा…४९४९…३४३८
जीरा…११८०…३१६१
तीळ…३३७९…२११०