PM-Kisan Samman Nidhi : प्रधानमंत्री किसान सन्मान निधी योजनेंतर्गत हप्ते मिळालेल्या बिहारमधील ८० हजारांहून अधिक शेतकऱ्यांना मोठा धक्का बसला आहे. इनकम टॅक्स आणि अन्य कारणांमुळे अपात्र ठरलेल्या शेतकऱ्यांना योजनेअंतर्गत मिळालेला निधी सरकारला परत करावा लागणार आहे.

बिहार राज्य सरकारचे कृषी संचालक (कृषी) आलोक रंजन घोष यांनी माहिती दिली की, केंद्र सरकारने बिहारमधील एकूण ८१ हजार ५९५ पीएम किसान सन्मान निधीचे लाभार्थी अपात्र ठरवले आहे. त्या अपात्र शेतकऱ्यांकडून पैसे काढण्याची प्रक्रिया जलद करण्यास सांगितले आहे. राज्यातील ८१ हजार ५९५ शेतकऱ्यांकडून सुमारे ८१.५९ कोटी रुपये परत घ्यायचे आहेत.

आलोक रंजन घोष पुढे म्हणाले, “राज्यस्तरीय बँकर्स समितीच्या नुकत्याच झालेल्या बैठकीत, बँकांच्या सर्व वरिष्ठ अधिकाऱ्यांना अपात्र शेतकऱ्यांकडून रक्कम परत करण्याची प्रक्रिया सुरू करण्यास सर्वोच्च प्राधान्य देण्यास सांगण्यात आले आहे. आवश्यक असल्यास, अपात्र शेतकर्‍यांना नवीन स्मरणपत्रे पाठविण्याचा सल्ला देखील बँकांना देण्यात आला आहे. याशिवाय अपात्र शेतकऱ्यांच्या खात्यातून होणारे व्यवहारही बँकांना थांबवण्यास सांगण्यात आले आहे.