Jalana News : सोयाबीन पिकांवर ‘यलो मोझॅक’ रोगाचा प्रादुर्भाव झाला आहे. काही भागातील सोयाबीन वाळू लागली आहे. आधी पावसाअभावी पिकांच्या उत्पादनात होणारी घट त्यातच या रोगांच्या प्रादुर्भावामुळे सोयाबीन उत्पादक दुहेरी संकटात सापडले आहेत.

गेल्या काही वर्षांपासून सोयाबीन व कापूस दर शेतकऱ्यांसाठी दिलासादायक ठरत आहेत. त्यामुळे या दोन्ही पिकांच्या क्षेत्रात वाढ होत आहे. मात्र सोयाबीनवर यंदा ‘यलो मोझॅक’ने हल्ला केला आहे, त्यामुळे उत्पादनात घट होण्याची शक्‍यता आहे.

घनसावंगी तालुक्‍यात शेतकऱ्यांनी कापसांबरोबर सोयाबीनची मोठ्या प्रमाणात पेरणी केली. पेरणीदरम्यान अल्प पाऊस पडल्याने पीक काही प्रमाणात तग धरून होते. त्यानंतर पाऊस झाल्याने या पिकांना नवजीवन प्राप्त झाले. मात्र मध्यतंरी एक ते दीड महिना पाऊस पडला नाही. त्यामुळे सोयाबीनचे पीक सुकू लागले होते.

कडक ऊन, ढगाळ वातावरण, रिमझिम पाऊस अशा वातावरणातील बदलांचा सोयाबीनच्या पिकावर परिणाम झाला. सोयाबीनचे पीक कोमेजण्यासह शेंगा देखील वाळू लागल्या आहेत.

त्यातच यलो मोझॅक रोगापासून पीक वाचविण्यासाठी शेतकरी महागड्या कीटकनाशकांची फवारणी देखील करीत आहे. पावसांच्या उघडिपीमुळे पाण्याची समस्या, वाढते तापमान यांचा फटका पिकाला बसला आहे. त्यामुळे सोयाबीनचे उत्पादन कमी होण्याची शक्‍यता आहे.