Mumbai News : बिरसा मुंडा कृषी क्रांती योजनेचे निकष सुधारून विहिरी, शेततळे, वीजजोडणी आदींसाठी अनुदानात वाढ करण्याचा निर्णय गुरुवारी मंत्रिमंडळ बैठकीत घेण्यात आला.

या योजनेत सिंचन विहिरींसाठी याआधी अडीच लाख रुपये देण्यात येत होते. आता वहिरींसाठी चार लाखांपर्यंत तर जुन्या विहिरींच्या दुरुस्तीस ५० हजारांवरून एक लाखांपर्यंत अनुदान देण्यात येणार आहे

इनवेल बोअरिंगसाठी २० हजारांवरून ४० हजार यंत्रसामग्रीसाठी ५० हजार रुपये, परसबागेकरिता पाच हजार रुपये अनुदान देण्यात येईल. नवीन विहिरींबाबत १२ मीटर खोलीची अट रद्द करण्यात आली आहे.

शेततळ्याच्या प्लॅस्टिक अस्तरीकरणासाठी सध्या एक लाख रुपये अनुदान देण्यात येते आता ते प्रत्यक्ष खर्चाच्या ९० टक्के किंवा २ लाख यापैकी जे कमी असेल ते देण्यात येईल. त्याच प्रमाणे तुषार सिंचनासाठी सध्या २५ हजार रुपये देण्यात येतात.

आता तुषार सिंचन संच ४७ हजार रुपये किंवा प्रत्यक्ष खर्चाच्या ९० टक्के अनुदानापैकी जे कमी असे ते अनुदान देण्यात येईल. अशा प्रमाणे ठिबक सिंचन संचासाठी अल्प, अत्यल्प व बहुभूधारकांना ९७ हजार किंवा ठिबक सिंचन संचाच्या प्रत्यक्ष खर्चाच्या ९० टक्क्यांपैकी जे कमी असेल ते अनुदान देण्यात येणार आहे.