Gondiya News : कोट्यवधी रुपयांची उलाढाल असलेल्या दि. तालुका सहकारी शेतकी खरेदी-विक्री समिती निवडणुकीसाठी ७२ पैकी ५५ जणांनी अर्ज मागे घेतले. परिणामी ही निवडणूक (Election) बिनविरोध झाल्याने आश्चर्य व्यक्त होत आहे.

अर्जुनी मोरगाव तालुक्‍यात दि. तालुका सहकारी शेतकरी खरेदी-विक्री समितीची निवडणूक प्रतिष्ठेची समजली जाते. या समितीवर गेल्या पंचवार्षिकपासून भाजप समर्थकांचे वर्चस्व आहे. भाजप समर्थकांच्या हाती एकहाती सत्तेने काँग्रेस, राष्ट्रवादीच्या गोटात अस्वस्थता आहे.

त्यामुळे या दोन्ही पक्षाच्या समर्थकांनी यापूर्वी अनेकदा निवडणुकीत भाजपला तगडे आव्हान दिले. या समितीचे आजघडीला चार हजार २४२ वैयक्‍तिक सभासद आहेत.

अर्जुनी मोरगाव तालुक्‍यातील राजकीय गोटात नेतृत्वामध्ये यावेळी खरेदी-विक्री समितीच्या निवडणुकीत उच्चांकी आकड्यांनी उमेदवारी भरण्यात गावपातळीवरील कार्यकर्ते पुढे आले.

नामांकन मागे घेण्याच्या अखेरच्या दिवशी तब्बल ५५ उमेदवारांनी एकाचवेळी माघार घेतल्याने आश्‍चर्य होत आहे.