Pune News : शिंदोडी व गुनाट (ता.शिरूर) हद्दीतील घोडनदी पात्रात वाळू माफिया पुन्हा सक्रिय झाले आहेत. बेसुमार वाळू उपसा करण्याबरोबरच हेच वाळू माफिया शेतकऱ्यांच्या शेतातून, प्रसंगी उभ्या पिकातून वाळू वाहतूक करत आहेत.

वाळू माफियांच्या अशा राजरोसपणे सुरू असलेल्या धुडगुसामुळे शेतकरी घाबरले आहेत. ‘‘साहेब, काही पण करा! पण या वाळू माफियांना आवर घाला.’’ असे लेखी अर्ज महसूल विभागाकडे येथील शेतकरी करत आहेत. पीडित शेतकरी भीवसेन कोळपे यांनीही महसूल विभागाला लेखी अर्ज करून साकडे घातले आहे.

शिंदोडी गुनाट हद्दीत सध्या घोडनदीचे पाणी खालावत चालल्याने वाळू माफियांची बेकायदा वाळू काढण्यासाठी चढाओढ लागली आहे. रात्री चार ते पाच बोटींतून येथे बेसुमार वाळू काढली जाते. तर वाळूच्या वाहतुकीसाठी रस्ताच नसल्याने हे वाळू माफिया थेट शेतकऱ्यांच्या शेतातूनच वाळूची वाहतूक करत आहे.

कोळपे यांच्या नदीलगत असलेल्या गट क्रमांक १६१ व गट क्रमांक १६२ या शेतातून वाहतूक केल्याने जलवाहिनीचे नुकसान झाले आहे तर जमीनही कसण्यासाठी अयोग्य बनली आहे. दरम्यान, महसूल विभागाच्या अधिकाऱ्यांशी संपर्क साधला असता तो होऊ शकला नाही.