Sindhudurg News: पर्यटन हंगाम आणि मुंबईकरांची होणारी गर्दी यामुळे मे महिन्याच्या दुसऱ्या आठवड्यात उत्पादन मिळेल या अपेक्षेने लागवड केलेली शेकडो टन कलिंगडे मॉन्सूनपूर्व पावसामुळे शेतातच कुजली गेली आहेत. एक हजार टन कलिंगडे कुजल्याचा प्राथमिक अंदाज आहे. या नुकसानीचे कृषी विभागाकडून पंचनामे करण्यात आलेले नाहीत.

सिंधुदुर्गात गेल्या काही वर्षात कलिंगड लागवडीखालील क्षेत्र मोठ्या प्रमाणात वाढले आहे. पेंडुर, विलवडे, बिबवणे, झाराप, गडमठ, नांदगाव, तिथवली, नांदोस यांसह अनेक गावांमध्ये कलिंगड उत्पादन घेतले जाते. नोव्हेंबर महिन्यांपासून कलिंगड लागवडीला सुरुवात होते. नोव्हेंबर ते जानेवारी आणि फेब्रुवारी ते मे अशा दोन टप्प्यांत कलिंगड लागवड होते.

अनेक शेतकरी कुणकेश्‍वर यात्रा, आंगणेवाडी यात्रा कालावधी नजरेसमोर ठेवून लागवड करतात. याशिवाय मेमध्ये जिल्ह्यात येणारे पर्यटक आणि मुंबईकरांच्या गर्दीचा विचार करून लागवड केली जाते. या कालावधीत कलिंगडला चांगला दर मिळतो. या वर्षी देखील शेकडो शेतकऱ्यांनी मे महिन्याच्या पहिल्या आठवड्यापासून २० मेपर्यंत उत्पादन मिळेल असे नियोजन करीत लागवड केली होती.

पहिल्या, दुसऱ्या आठवड्यापासून उत्पादनाला सुरुवात झाली. काहींनी काढणी सुरू केली होती, परंतु काही भागांत ८ रोजी मुसळधार पाऊस झाला. त्यानंतर जिल्ह्याच्या वेगवेगळ्या भागांत जोरदार पाऊस झाला. त्यामुळे कलिंगडाची मागणी घटली. सिंधुदुर्गातील अधिकतर कलिंगडे गोव्यात पाठविली जातात.

मात्र यंदा पावसामुळे मागणी ठप्प झाली. २० मेपासून सुरू झालेल्या मुसळधार पावसाने शेकडो टन कलिंगडे शेतातच कुजण्याची प्रकिया सुरू झाली. जिल्ह्यात १ हजार टनांपेक्षा अधिक कलिंगड शेतातच कुजून गेले असून, लाखो रुपयांचे नुकसान शेतकऱ्यांचे झाले आहे. मात्र कृषी विभागाने काही अपवाद वगळले तर या नुकसानीचे पंचनामे केलेले नाहीत.