Pune News : अकोला, बुलडाणा जिल्ह्यात गुरुवारी (ता.१५) सायंकाळी झालेल्या अवकाळी पावसाने जोरदार हजेरी लावली. यावेळी येथे विजांचा कडकडाटासह जोरदार पाऊस झाला. या झालेल्या पावसाने बुलढाणा, खामगाव, चिखली, नांदुरा या तालुक्यात शेतीचे शेकडो हेक्टर नुकसान झाले आहे. तर शेगाव तालुक्यातील टाकळी येथील विरो शिवारात वीज पडून एका युवकाचा मृत्यू झाला. त्याचे नाव सूरज सुभाष निंबाळकर (वय २२) असून तो पंपावर काम करीत होता.

बुलढाण्यात १५ फेब्रुवारीच्या सायंकाळी व रात्री जोरदार वादळी वाऱ्यासह अवकाळी पावसाने हजेरी लावली. हा अवकाळी जिल्ह्यातील बुलढाणा, खामगाव, चिखली, नांदुरा या तालुक्यात झाला. यामुळे ४८ गावातील १ हजार ८६ हेक्टर क्षेत्रावरील रब्बी पिके व फळबागांचं नुकसान झाल्याचे कृषी विभागाने केलेल्या प्राथमिक पाहणीत समोर आले आहे.

कृषी विभागाने ही पाहणी शुक्रवारी (१६ रोजी) केली. या पाहणीत ४८ गावांना अवकाळीचा फटका बसल्याचे समोर येत आहे. तसेच येथे १ हजार ८६ हेक्टर क्षेत्रावरील गहू, रब्बी ज्वारी, हरभरा व मका या पिकासह फळबागांचे नुकसान झाल्याचे समोर आले आहे.

सर्वाधिक तडाखा हा बुलढाणा तालुक्याला बसला असून येथे ४०५ हेक्टरवरील रब्बी पीक शेतकऱ्यांच्या हातातून गेले आहे. येथे गहू, शाळू, मका व हरभरा या पिकांची मोठी नासाडी झाल्याचा अहवाल कृषी अधीक्षक मनोज ढगे यांनी जिल्हाधिकारी किरण पाटील यांना सादर केला आहे.

वाशीममध्ये शेतमाल भिजला

वाशीममध्ये अचानक आलेल्या अवकाळी पावसामुळे बाजार समितीत ठेवलेला शेतमाल भिजला. येथे खरेदी-विक्रीसाठी ठेवलेली सुमारे ५०० पोत्यातील शेतमाल भिजला. हा शेतमाल झाकण्यासाठी शेतकरी आणि व्यापाऱ्यांना वेळ मिळू शकला नाही. यामुळे शेतकऱ्यांसह व्यापाऱ्यांचे मोठे नुकसान झाले आहे.