Latur News: मोठ्या खंडानंतर लातूर, धाराशिव या दोन्ही जिल्ह्यात सोमवारी (ता. २१) सायंकाळी पावसाने जोरदार हजेरी लावली. यामुळे पावसाची डोळ्यात तेल घालून प्रतीक्षा करणाऱ्या शेतकऱ्यांना दिलासा मिळाला असून पावसाने सुकत असलेल्या पिकांना जीवदान मिळाले आहे.

लातूर जिल्ह्यात सोमवारी सकाळी आठ वाजेपर्यंत मागील २४  तासांत सरासरी ३०.५  मिलिमीटर तर धाराशिव जिल्ह्यात सरासरी २८. ४ मिलिमीटर पाऊस झाला आहे? लातूर जिल्ह्यात शिरूर अनंतपाळ तालुक्यात सर्वाधिक ६२.३ मिलिमीटर, तर जळकोट तालुक्यात सर्वात कमी १२.५ मिलिमीटर पाऊस झाला आहे.

तालुकानिहाय पावसाची आकडेवारी पुढीलप्रमाणे आहे- लातूर- ३२.६, औसा- ३५.६, अहमदपूर- १२.६, निलंगा- ३१.९, उदगीर- ३०.९, चाकूर- ३०.३, रेणापूर- ३४.४, देवणी- २५.६, शिरूर अनंतपाळ- ६२.३ आणि जळकोट- १२.५ मिलिमीटर. पेरण्यानंतर पावसाने हुलकावणी दिली होती. काही भागात कमीअधिक प्रमाणात पाऊस पडत होता.

मात्र, तो पिकांसाठी पुरेसा नव्हता. यामुळे शेतकरी तुषार सिंचनाच्या साह्याने पिकांना जगवण्याचा प्रयत्न करत होते. पेरण्यानंतर महिन्यापासून मोठ्या पावसाची प्रतीक्षा शेतकऱ्यांना होती. सोमवारी सायंकाळी ती पूर्ण झाली. मंगळवारी (ता. २२) पावसाचे वातावरण असून आणखी पाऊस होण्याची आशा शेतकऱ्यांना आहे. 

धाराशिव जिल्ह्यातही पावसाची हजेरी 

धाराशिव जिल्ह्यातही पावसाने मोठा खंड दिला होता पिकांना वाचवण्यासाठी शेतकरी प्रयत्न करत होते. सोमवारच्या पावसामुळे पिकांना मोठा आधार मिळाला आहे. जिल्ह्यात सोमवारी तालुकानिहाय पडलेला पाऊस पुढील प्रमाणे आहे. धाराशिव ः ३२, , तुळजापूर ः २७.६, परंडा ः १२, भूम ः ३१.२, कळंब ः  ३१.७, उमरगा ः ३०.२, लोहारा ः २३.७ व वाशी ः ४१.४