Satara News : सातारा जिल्ह्याच्या अनेक भागाला रविवारी (ता.१४) पावसाने झोडपून काढले आहे. पश्चिमेकडील पाटण, महाबळेश्वर, जावळी, सातारा, कऱ्हाड, वाई तालुक्यांत अनेक ठिकाणी जोरदार पाऊस झाल्याने शेतात पाणी साचण्याबरोबर नदीच्या पाणीपातळीत वाढ झाली आहे. जिल्ह्यात २४ तासांत सरासरी ३५.८ मिलिमीटर पावसाची नोंद झाली आहे. सर्वाधिक पाऊस पाटण तालुक्यात झालेला आहे.

पावसाच्या प्रतीक्षेत असलेल्या शेतकऱ्यांना रविवारी दिलासा मिळाला आहे. अनेक भागात संततधार पाऊस सुरू होता. शनिवारी (ता.१३) मध्यरात्रीपासून पावसाचा जोर वाढण्यास सुरुवात झाली. रविवारी संततधार पाऊस सुरूच होता. सोमवारी पहाटेपासून पावसाचा जोर ओसरण्यास सुरुवात झाली.

पाटण तालुक्यात जोरदार पाऊस झाल्याने अनेक घरांची पडझड झाली असून शेत पाण्याखाली गेले आहे. या तालुक्यातील ढेबेवाडी, मोरगिरी, निगडे येथे पाऊस झाला आहे. यामुळे नदीच्या पाणीपातळीत वाढ झाली आहे.

सातारा तालुक्यातील अतित, काशीळ, कास, परळी परिसरांत जोरदार पाऊस झाला आहे. वाई तालुक्यातील वाई, पाचवड परिसरांत पावसाने दमदार हजेरी लावली आहे. माण, खटाव. फलटण, खंडाळा, कोरेगाव या दुष्काळी तालुक्यांत मात्र तुरळक पाऊस झाला आहे.

तालुकानिहाय पाऊस (मिलिमीटरमध्ये)

सातारा ३२.४, जावळी २४.९, पाटण १०७.४, कऱ्हाड ७१.३, कोरेगाव ८.३, खटाव ८.५, माण २.६, फलटण ३.५, खंडाळा २.३, वाई ११.९, महाबळेश्वर ७३.१.