Pune News : पावसाने राज्यात उघडीप दिली आहे. तरीही तुरळक ठिकाणी मध्यम ते जोरदार पाऊस पडत आहे. विदर्भाच्या पूर्व भागात काही अंशी ढगाळ वातावरण असून तुरळक ठिकाणी हलक्या सरी बरसत आहे.

गडचिरोली जिल्ह्यात सर्वदूर जोरदार पाऊस झाला. सोमवारी (ता. ९) सकाळी आठ वाजेपर्यंत गडचिरोली जिल्ह्यातील तरडगाव येथे सर्वाधिक १८९ मिलिमीटर पाऊस पडला. तर दिवसभर ऊन व ढगाळ वातावरणाचा खेळ सुरू होता.

कोकणात पाऊस नसला तरी रायगडमधील बिरवडी येथे २८ मिलिमीटर, तर रोहा, नागोठणे येथे २० मिलिमीटर, रत्नागिरीतील पाचल येथे ३६ मिलिमीटर, तर कुंभवडे ३१, धामनंद ३४, सौंदळ येथे ३२ मिलिमीटर, तर सिंधुदुर्गमधील मडूरा येथे ३३ मिलिमीटर, तर तळवट ३१, फोंडा येथे ३० मिलिमीटर, तर कणकवली, सांगवे, सावंतवाडी, बांदा येथे हलक्या सरी पडल्या.

पालघरमधील झरी येथे ७५ मिलिमीटर, तर साइवन ३५, तलसरी येथे ३८ मिलिमीटर पाऊस झाला. घाटमाथ्यावर पावसाने चांगलीच विश्रांती घेतली आहे. दावडी घाटमाथ्यावर ८२ मिलिमीटर, तर डुंगरवाडी ४९ मिलिमीटर, ताम्हिणी ४५, शिरगाव ४२, कोयना ३९ मिलिमीटर पाऊस पडला.

कोल्हापुरातील कडगाव येथे ३१ मिलिमीटर, तर करंजफेन, मलकापूर, आंबा, राधानगरी, सरवडे, कसबा, आवळी, कसबा, गगनबावडा, साळवण, गारगोटी, कराडवाडी, चंदगड, नारंगवाडी, हेरे येथे तुरळक सरी पडल्या. मराठवाड्यात सोमवारी (ता. ९) परभणी जिल्ह्यात अनेक ठिकाणी हलका पाऊस झाला असून मानवत येथे जोरदार पाऊस झाला.