Sindhudurg News : सिंधुदुर्ग जिल्ह्यातील २९ हजार टन उसाची तोडणी पूर्ण झाली असून, अद्याप २५ हजार टन ऊस तोडणी शिल्लक आहे. गेल्या २० दिवसांत तोडणीची गती मंदावली आहे. त्यामुळे तोडणी लांबण्याची शक्यता आहे.

सिंधुदुर्ग जिल्ह्यात १ हजार २०० हेक्टरवर ऊसलागवड आहे. वैभववाडी, कणकवली तालुक्यात ऊस लागवडीचे प्रमाण अधिक आहे. याशिवाय मालवण आणि कुडाळ तालुक्यांतदेखील काही प्रमाणात ऊसलागवड आहे.

करूळ घाट काँक्रिटीकरणाचे काम महामार्ग प्राधिकरणाने हाती घेतल्यामुळे ऊस उत्पादकांनी नोव्हेंबरमध्येच काम सुरू करण्यापूर्वी जिल्ह्यातील ऊसतोडणी करावी, अशी मागणी केली होती. कारखाना प्रशासनाने देखील त्यांनी दखल घेत हंगामाच्या सुरुवातीपासूनच जिल्ह्यातील ऊसतोडणीवर भर दिला.

सुरुवातीच्या महिनाभरात गतीने ऊसतोडणी झाली. २६ डिसेंबरपर्यंत जिल्ह्यातील २४ हजार टन उसाची तोडणी पूर्ण झाली होती. त्यानंतर गेल्या २५ दिवसांत केवळ ५ हजार टन उसाची तोडणी पूर्ण करण्यात आली आहे.

त्यामुळे आतापर्यंत २९ हजार टन उसाची तोडणी पूर्ण झाली आहे. अद्याप २५ हजार टन उसाची तोडणी शिल्लक आहे. गेल्या पंचवीस दिवसांत तोडणीची गती मंदावल्याने तोडणीला विलंब होण्याची शक्यता आहे.

सोमवारपासून (ता. २२) करूळ घाटमार्ग वाहतुकीस बंद करण्यात आला आहे. या महामार्गाच्या काँक्रिटीकरणाचे काम सुरू आहे. त्यामुळे आता ऊसवाहतूक भुईबावडा घाटमार्गे करावी लागणार आहे. त्यामुळे वाहतुकीचा प्रश्नदेखील निर्माण होण्याची शक्यता आहे.