Theane News : गुरुपौर्णिमा हे भारतात गुरू-शिष्य परंपरेचे प्रतीक मानला जाणारा पवित्र सण आहे. या दिवशी शिष्य आपल्या गुरूंचे फुलांद्वारे आदर आणि कृतज्ञता व्यक्त करतात. गुलाबफुल हे गुरूप्रती भावना व्यक्त करण्याचे एक महत्त्वाचे साधन आहे. यासाठी गुरुपौर्णिमेनिमित्त गुलाब फुलांची मागणी प्रचंड वाढली आहे.

सध्या डोंबिवलीतील बाजारात १० ते १५ रुपयांना विकले जाणारे एक फूल २५ रुपयांवर पोहचले आहे. गुरुपौर्णिमा साजरी करण्यासाठी शाळा, महाविद्यालयांमध्ये कार्यक्रम घेतले जातात. सध्या गुरुपौर्णिमेनिमित्त बाजारात गुलाबफुलांची मागणी वाढली आहे. मात्र, दरवाढीमुळे अनेक विद्यार्थी आणि पालकांनी भेटवस्तूंचा पर्याय निवडला आहे.

यामध्ये हस्तनिर्मित ग्रीटिंग कार्ड्स, डायरी, पेन, बुकमार्क्स, छोटे शोपीस, ध्यानयोगासंबंधित साहित्य, तसेच वॉल पेंटिंग्स यांचा समावेश आहे. गुलाबफुलांच्या किमतीत २५ ते ३० टक्क्यांपर्यंत वाढ झाली आहे. साधारणतः जे लाल गुलाब दररोज १० ते १५ रुपये प्रति फूल विकले जात होते, तेच आता २० ते २५ रुपयांवर पोहोचले आहेत. मोठ्या आकाराचे आणि आकर्षक गुलाब ३० ते ३५ रुपयांपर्यंत विकले जात आहेत.

हस्तनिर्मित कार्ड्स

अनेक जण आपल्या आईला गुरू मानतात. तर काही जणांचे आदर्श व्यक्ती असते. त्यांच्या आठवणीत आपण राहावे यासाठी हस्तनिर्मित कार्ड्स तयार करतात. यामुळे गुरुजण किंवा आई यांचा आनंद द्विगुणित होतो.